Në spitalin infektiv në QSUT ka ndërruar jetë një pacient 75-vjeçar me koronavirus. Me këtë rast, rritet zyrtarisht në 17 numri i personave të infektuar me virusin e ri që kanë ndërruar jetë.
“Pacienti ka mbërritur në spital në gjendje të rëndë, teksa vuante nga post-hemorragjia cerebrale, diabeti dhe hipertensioni. Pacienti me inicialet A.C., ishte testuar dhe kishte rezultuar pozitiv me Covid19, ndërkohë që, gjendja e tij shëndetësore është rënduar në mënyrë të menjëhershme”, njoftoi Ministria e Shëndetësisë.
“Pavarësisht përpjekjeve të mjekëve të Spitalit Infektiv për ta asistuar në kohë rekord, pacienti nuk ia ka dalë të mbijetojë. Ministria e Shëndetësisë dhe Mbrojtjes Sociale i shpreh ngushëllimet familjes së të ndjerit dhe u bën edhe një herë thirrje qytetarëve, që të zbatojnë në mënyrë rigoroze masat e distancimit social dhe të izolimit, të cilat janë të domosdoshme për frenimin e përhapjes së COVID-19”, thuhet me tej ne njoftim.
Në një dalje për mediat më herët gjatë ditës, zëvendësministrja e Shëndetësisë Mira Rakacolli bëri me dije se numri i të prekurve me koronavirusi në vend u rrit në 304, me 27 raste të reja në 24 orët e fundit.
Bilanci i ri i COVID-19/ Rritet me 27 numri i të infektuarve, 13 të shëruar gjatë 24 orëve
