Policia e Kurbinit së bashku Forcat Speciale “Renea” dhe Interpol Tirana kanë ekzekutuar në orët e para të mëngjesit operacionin e koduar “GODULL 2020”.
Në kuadër të këtij operacioni është vënë në pranga shtetasin e shpallur në kërkim kombëtar A. J. alias A. Zh., 40 vjeç.
“Në orët e para të mëngjesit, në fshatin Godull, forcat e Policisë kanë rrethuar banesën e këtij shtetasi duke bërë të mundur prangosjen e tij.
Shtetasi i lartpërmendur ishte person i shpallur në kërkim kombëtar nga Komisariati i Policisë Kurbin, pasi Gjykata e Shkallës Parë Kurbin i ka caktuar masën e sigurisë “Arrest në burg”, për veprat penale “Vrasja me paramendim e mbetur në tentativë”, “Armëmbajtja pa leje” dhe “Kundërshtim i punonjësit të policisë së rendit publik”.
Gjithashtu, ky shtetas ishte shpallur në kërkim ndërkombëtar, pasi Gjykata e Romës, Itali, i ka caktuar masën e sigurisë “Arrest në burg”, për veprat penale “Grabitja me armë ”, “Plagosja” dhe “Armëmbajtja pa leje”. Maksimumi i dënimit për këto vepra penale është 20 vjet burg.” -thuhet në njoftimin e policisë.
Materialet i kaluan prokurorisë, për veprime të mëtejshme.
