Për shkak të Coronavirusit, organet qeverisëse të cilat kanë në dorë fatet e futbollit, si UEFA, FIFA dhe federatat e futbollit janë vendosur në një pozicion të vështirë.
Para pak kohësh UEFA vendosi të shtyhej EURO 2020, ndërsa të njëjtin vendim mori edhe CONMEBOL për Copa America.
Fillimisht udhëzimi i UEFA’s, ishte përfundimi i kampionateve deri më 30 qershor. Kjo duket një ide që nuk mund të realizohet, pasi situata ende është tepër problematike kudo.
Zgjidhja, sipas asaj që raporton italiania Corriere dello Sport, është që të vazhdohet deri në muajin gusht. Presidenti i FIGC, Gravina, e tha diçka të tillë një ditë më parë dhe plani është që deri në mesin e korrikut të mbarojnë kampionatet dhe kupat.
Pasi të ndodhë kjo, mendohet që të zhvillohen Europa League dhe Champions League, pjesa e mbetur e këtyre garave. Sigurisht nuk ka asgjë përfundimtare dhe bisedimet vazhdojnë. Ajo që dallohet qartë, është se të gjithë duan që sezonin aktual futbollistik duan ta mbyllin në fushë dhe arsyet janë më së shumti financiare.
