Jo vetëm virusi! Veriu i Greqisë është përballur me një tërmet të fuqishëm orët e para të kësaj të shtune.
Tërmeti me magnitudë 5.6 i shkallës Rihter u regjistrua në 02.49 në veri-lindje të Pargës, sipas Institutit Gjeodinamik të Observatorit Kombëtar të Athinës.
Epiqendra u lokalizua 11 kilometra në veri-lindje të Pargës dhe thellësia fokale 10 kilometra.
Tërmeti u ndje veçanërisht në Thesprotia dhe Prevezë. U ndje edhe në Janinë, Arta, Korfuz dhe në zona të tjera. Sipas raportimeve, janë tre të plagosur.
Tërmeti i fortë ka shkaktuar dëme serioze në Kanallaki. Në veçanti, disa shtëpi të vjetra janë shembur dhe shumë banorë janë dëmtuar. Po ashtu në rrjetin rrugor krahinor ka pasur rrëshqitje të dheut dhe rrëzime gurësh, si dhe ndërprerje të energjisë elektrike, që tanimë raportohet se u rivendos.
Në Kanallaki, tre persona me lëndime të lehta janë transferuar në spitalin e Janinës pasi ai në Prevezë është në karantinë.
“Nuk parashikoj një zhvillim më të madh në këtë kohë, mos u shqetësoni”, deklaroi sizmologu Gerasimos Chouliara.
Video e regjistruar në qytetin e Korçës
Lëkundjet e tërmetit në Greqi janë ndjerë dhe në vendin tonë. /BoldNews.al/
