Nga Boldnews.al
Kryeministri Edi Rama doli nga kulla e tij, për tu futur sërish në botën virtuale, por këtë herë në një videokonferencë me kryeministrat e Ballkanit Perëndimor. Pa nga larg edhe mikun Aleksandër Vuçiç dhe të “urryerin” Albin Kurti, por kjo videokonferencë bëhet në kohë coronavirusi dhe kryeministri ynë nuk ikën dot nga virusi i vjetër, lypje dhe borxh nëpër europë, pasi ka zbrazur buxhetin e shtetit nga koncesione, luks zyrash dhe grabitje në tendera.
“Shqipëria ka vepruar shpejt e saktë në marrjen e masave shtrënguese dhe ndërkohë që lufta vazhdon, plani ekonomik i reagimit ndaj pasojave po merr formë”- shkruan Rama, duke shtuar se do të kërkohet edhe ndihmë nga vendet e Bashkimit Europian për të kapërcyer këtë situatë.
I mësuar me lypje dhe i pandreqshëm në shpërdorimin e fondeve, kryeministri Edi Rama duket se edhe këtë situatë që ka gjunjëzuar botën po e merr mjaft lehtë, jo nga moskuptimi, por papërgjeshmëria. Qytetart në vend janë në ditën e pestë në karantinë shtëpiake, duke iu bindur rregullave, për tu mbrojtur nga virusi “COVID-19”, por tashmë po shpërthen “epidemia e urisë”.
Ra tërmeti tragjik I 26 nëntorit dhe Rama rendi nëpër Europë me dorën shtrirë dhe me lutje për të “ndihmuar popullin shqiptar”. Rreth 300 milionë euro ia falën, por afër 800 milionë të tjera janë borxh dhe nuk dihet nëse do të lëvrohen pikërisht për shkak të krizës që ka përfshirë çdo shtet në Europë nga coronavirusi, i cili është shpallur zyrtarisht si pandemi edhe nga Organizata Botërore e Shëndetësisë.
Mes të prekurve janë mijëra familje shqiptare që nuk kanë një strehë në kokë nga tërmeti, por tashmë vuajnë edhe pasojat e shpërthimit të epidemisë së coronavirusit, duke e çyuar në 55 numrin e personave të konfirmuar në vendin tonë, por mendohet të jetë një shifër shumë më e lartë.
Deri më tani janë vetëm masat shtrënguese, por kryeministri premton një shfaqje të madhe të enjten, që sipas tij do të bëjë publike, po nga Surreli masat lëhtësuese për biznesin që është detyruar të dërgojë në shtëpi punëtorët, duke ndërprerë prodhimtarinë.
Nuk ka ende një vëmendje për 300 mijë familje në nevojë të cilët janë detyruar të mbyllen në shtëpi, në kushtet e mbijetesës dhe gati në shpërthim të urisë. Deri më tani një pjesë e madhe kanë shtrirë dorën e borxheve nëpër njerëz të njohur dhe të afërm, për të blerë produktet bazë ushqimore, por kjo nuk mund të funksionojë përgjithnjë.
Borxhi i qytetarit është shumë më i rëndë se borxhi që kërkon Rama nëpër vendet e Bashkimit Europian. Vetë kryeministri, kabineti i tij dhe shumë zyrtarë të lartë jetojnë pa e çuar në mendje se një ditë do u soset ushqimi. Për ta produkti më i “vlefshëm” që e kanë me shumicë është propaganda.
Pikërisht papërgjeshmëria dhe bindja se me propagandë mposhtet gjithçka edhe sëmundja, edhe uria mund ti kthehen në boomerang. I pasuri i Shqipërisë, këtë herë nuk mund të mendojë se do e hedhë lehtë duke u kthyer në “lypës” nëpër Europë.
