Në kohë të vështira si këto, me një armik të panjohur e me sa duket të verbër, kujtdo i shkon mendimi në pak sekonda te e ardhmja, te fëmijët.
Një nga të paktat sinjale të mira që morëm fillimisht ishte se ndoshta COVID-19 , nuk i kishte target fëmijët, por realiteti na e ka përplasur të kundërtën. Për fat të keq, provën e parë e ka dhënë një foshnje shqiptare, vetëm 4 muajshe, në pallatin ku u identifikua edhe pacienti 1, në Codongno të Italisë.
Babai i fëmijës, Luan Sulejmani, foli në një lidhje me “Skype” në A2 për gjendjen e djalit të tij vetëm 4 muajsh.
“Ai kishte temperaturë të lartë gjatë kohës që po ushqehej. Menduan se kishte ftohje. Temperatura ishte nga 38.5 deri në 39.5. Ambulanca erdhi pas 8 orësh dhe pasi i bëmë tamponin rezultoi se ishte me koronavirus. Jetojmë në të njëjtin pallat ku ka rezultuar edhe pacienti 1. Pas 5 ditësh në spital, djali tashmë është më mirë, nuk ka temperaturë as diarre. As pjesëtarët e tjetër të familjes nuk kanë pasur simptoma. Por për fat të keq nuk na e kanë bërë tamponin, pasi nuk kemi simptoma. Ne e kemi kërkuar, por nuk kanë pranuar”, u shpreh Luan Sulejmani.
