Ndryshe nga Shqipëria, ku masat ndaj koronavirusit u morën kryesisht pasi në vend u konfirmuan rastet e para, Mali i Zi po përdor një politikë krejt ndryshe. Shteti fqinjë ka vendosur të marrë një sërë masash të rrepta kundër virusit të ri, edhe pse atje nuk është konfirmuar asnjë rast pozitiv (shteti i vetëm në Europë i paprekur nga COVID-19).
Sipas mediave vendase, javën e kaluar u vendos pezullimi i mësimdhënies në shkolla e universitete, ndërsa sot janë miratuar masa shtesë të ngjashme me ato në vendin tonë dhe vende të tjera të prekura, si mbyllja e lokaleve, restoranteve, palestrave, etj…
“Në Mal të Zi, ne po bëjmë gjithçka që mundemi për të vonuar shfaqjen e koronavirusit, parandalimin e përhapjes dhe sigurimin e kujdesit më të mirë të mundshëm mjekësor,” tha Zëvendëskryeministri Milutin Simovic në një konferencë për media.
Ndër masat e reja të miratuara dje ishte një izolim i detyrueshëm 14-ditor për qytetarët malazez dhe të huajt me vendbanim të përhershëm të ardhur nga jashtë.
Mbyllja e kufijve
Ndryshe nga vendi ynë që preferoi të mos merrte masa të tilla si mbyllja e kufijve kur në Itali dhe Greqi u shfaqën rastet e para, fakt që ka hapur debat në vend nëse qeveria ka veruar siç duhet, Mali i Zi po ndjek një politikë tjetër.
Masat shtesë nga autoritet malazeze përfshijnë një ndalim të përkohshëm të hyrjes në Mal të Zi për të gjithë të huajt, përveç shoferëve që transportojnë mallra.
“Trafiku i mallrave për nevojat e Malit të Zi, si dhe tranziti, mbetet i papenguar, me masa të posaçme të kontrollit shëndetësor dhe sanitar, forcim të kontrollit shëndetësor dhe sanitar, ose masa të karantinës ndaj personave që menaxhojnë mjetet e transportit të mallrave”, tha Simovic.
“Kufijtë nuk do të jenë të mbyllura për qytetarët malazezë dhe, shtoi ai, vëmendje e veçantë do t’i kushtohet kthimit të shtëpive të atyre që janë aktualisht në vende të tjera për shkak të punës, studimeve”…
Masat progresive
Në ditët në vijim, pritet një shtrëngim i masave në vendin fqinjë, si për shembull numri i klientëve në dyqanet me pakicë do të jetë i kufizuar, tregtarët pritet të sigurojnë një distancë sigurie me klientët, etj…
“Ne duam të mbetemi një pjesë pa viruse e Evropës dhe të tregojmë se të gjithë ne kemi aftësinë për të parandaluar shfaqjen dhe përhapjen e kësaj sëmundje në Mal të Zi”, tha drejtori i Institutit të Shëndetit Publik, Boban Mugoša, duke shtuar se suksesi varet nga të gjithë – institucionet, bizneset dhe qytetarët.
“Secili prej nesh kontribuon individualisht për këtë. Kërkoj nga të gjithë të respektojnë masat që kemi rekomanduar,” tha Mugosa.
