Shtetet e Bashkuara ofruan 1 miliardë dollarë për të blerë ekskluzivitetin e vaksinës që po zhvillohet nga firma gjermane CureVac. Sipas të përditshmes Di Velt, administrata Trump kërkon që vaksina të prodhohet vetëm për tregun amerikan pas përfundimit të testeve klinike çka për qeverinë gjermane është e papranueshme.
“ Qeveria gjermane është shumë e interesuar në sigurimin e vaksinës dhe substancave vepruese kundër koronavirusit të ri, që zhvillohen në Gjermani dhe Europë”.
Vetë firma CureVac hodhi poshtë ofertat në një deklaratë për shtyp.
“ Përpjekjet e brendshme janë të përqëndruara në zhvillimin e një vaksine për koronavirusin për të ndihmuar dhe mbrojtur pacientët në të gjithë botën. Nuk komentojmë për spekullimet dhe ofertat për blerjen e kompanisë apo teknologjisë së saj”.
Ajo çfarë e bën këtë vaksinë të kërkuar është fakti që dy doza të saj me një masë prej 1 mikrogrami, apo një të miliontën e gramit, ofrojnë mbrojtje ndaj koronavirusit.
Kjo mundëson prodhimin e shpejtë dhe në masë për të frenuar ritmet e shpejta të përhapjes globale të virusit. Testet kanë rezultuar pozitive tek lepujt dhe pritet nisa e provave tek njerëzit.
Gjithsesi para të gjitha firmave farmaceutike në botë, kompania amerikane Moderna do të nisë e para provat njerëzore për vaksinën më 19 mars.
