Mbi 100 persona që kanë hyrë në territorin shqiptar nga Italia në javët e fundit janë identifikuar nga Policia e Shtetit dhe Policia Ushtarake në thyerje të vetë-karantinimit.
Drejtori i Rendit Publik në Policinë e Shtetit, Albert Dervishaj ka deklaruar në emisionion “Opinion” se personat janë gjetur në Tiranë, Durrës, Fier dhe në Shkodër, në makina dhe kafene. Ata janë shoqëruar nga policia në shtëpi dhe janë këshilluar që të mos dalin. Po kështu ata do të rikontrollohen nëse vijojnë të qëndrojnë brenda banesave të tyre.
“Deri në këto momente, nga ora 17:00 dhe deri në mbrëmje janë identifikuar mjaft persona që kanë ardhur nga Italia në periudhën 2-javore.
Në Durrës, në Tiranë, në Fier, në Shkodër janë identifikuar persona nga këto kontrolle. Dhe është një numër që i kalon 100 persona. Durrësi, Tirana, Fieri, Shkodra dhe po t’i mbledhësh të gjitha janë 100 persona që kanë hyrë 2 javët e fundit nga Italia” , u shpreh Dervishaj.
Sipas shifrave zyrtare, COVID-19 ka prekur 15 persona në Shqipëri, ndërkohë që një e moshuar humbi jetën.
Ministria e Shëndetësisë u ka bërë thirrje të gjithë qytetarëve të tjerë që të ruajnë qetësinë, ndërkohë ata që kanë udhëtuar nga vende të prekura dhe ndiejnë simptoma të ngjashme me gripin, të telefonojnë në 127 dhe të mos shkojnë direkt në spitale.
Qeveria ka marrë një sërë marash shtrënguese kundër koronavirusit, duke mbyllur shkolla e universitetet, pube-t, palestrat dhe ka ndaluar të gjitha grumbullimet masive si konferenca, aktivitete sportive e kulturore. Autoritetet bëjnë thirrje që qytetarët të qëndrojnë në shtëpi dhe të evitojnë takimet me njerëz të tjerë.
Ndërkohë Policia e Shtetit dhe Forcat e Armatosura janë në terren për të kontrolluar të gjithë njerëzit që kanë ardhur së fundmi nga Italia.
Në Tiranë dhe Durrës janë mbyllur të gjitha lokalet dhe baret.
