Zyrtarët kinezë thonë se do të kenë gati një vaksinë për koronavirusin muajin tjetër për situata emergjente dhe prova klinike.
Tetë institucione në vend janë duke punuar në pesë qasje ndaj vaksinimeve në një përpjekje për të luftuar COVID-19, sipas South “China Morning Post”. Sëmundja ngjitëse ka sëmurur më shumë se 118,000 njerëz dhe ka vrarë të paktën 4,200 persona në të gjithë botën, kryesisht në territorin e Kinës.
“Sipas vlerësimeve tona, ne kemi shpresë se në prill disa nga vaksinat do të hyjnë në hulumtime klinike ose do të përdoren në situata emergjente,” tha të Premten Zheng Zhongwei, drejtor i Qendrës së Shkencës dhe Teknologjisë së Komisionit Kombëtar të Shëndetit.
Ndërsa do të duheshin të paktën 12-18 muaj për të siguruar që vaksinat janë të sigurta për publikun e gjerë, sipas ligjit kinez, ato mund të vendosen më herët për përdorim urgjent në një emergjencë të madhe shëndetësore publike, për sa kohë që përfitimet tejkalojnë rreziqet.
Zheng foli për shqetësimet për sigurinë e vaksinave, duke thënë se ato po zhvilloheshin në përputhje me “kërkesat teknike shkencore dhe të standardizuara”.
Në SHBA, kompania e bioteknologjisë me bazë në Massachusetts Moderna Inc. dërgoi vaksinën e saj pranë Institutit Kombëtar të Alergjisë dhe Sëmundjeve Infektive për testime në fund të muajit të kaluar. Rezultatet fillestare mund të jepen deri në korrik ose gusht.
