Presidenti i Getafes, Angel Torres Sanchez, më herët pati deklaruar se skuadra e tij nuk do të udhëtonte drejt Milanos për tu përballur me skuadrën e Interit, pasi sipas tij rrezikohej shëndeti i sportistëve dhe anëtarëve të stafit teknik nga situata e coronavirusit.
Madje në këtë pikë 67-vjecari ishte treguar kategorik, ku dhe deklaroi se ishte i gatshëm të pranonte edhe humbjen në tavolinë për mosparaqitjen në fushën e lojës.
Duket se këto deklarata UEFA i ka marrë fort parasysh, pasi pak më parë, organi më i lartë qeverisës i futbollit europian, doli me një deklaratë zyrtare teksa ka njoftuar se ndeshjet mes Interit dhe Getafes por edhe Sevilla ndaj Romës, nuk do të zhvillohen ditën e nesërme.
“Për shkak të reduktimeve dhe kufizimeve në udhëtimet mes Spanjës dhe Italisë të vendosura nga autoritetet spanjolle, ndeshjet e UEFA Europa League Sevilla-Roma dhe Inter-Getafe nuk do të zhvillohen siç ishin parashikuar, më 12 mars 2020. Vendime të tjera do të komunikohen kur të vijë koha”, lexohet në komunikatën e UEFA-s.
