Nga Boldnews.al
QSUT përfshihet në një skandal të madh përsa i përket menaxhimit të situatës së përhapjes së coronavirusit në Shqipëri. Infermierë dhe staf tjetër mbështetës, tërësisht i patrajnuar për sëmundjet infektive, do të detyrohen që të shpërbejnë në Spitalin Infektiv. Urdhri është lëshuar ditën e djeshme nga shefja e Burimeve Njerëzore në QSUT, të cilën ia ka nisur të administratorëve të të gjithë pavionëve.
Boldneës.al disponon e-mailin e Drejtoreshës së Burimeve Njerëzore në QSUT, Suela Zina ku kërkon listat me personel shtesë në rast të rrezikut të shtimit të numrit të pacientëve me coronavorus. Më poshtë emaili i plotë:
“Te nderuar,
Ne vijimi te situates virale, ne te cilen ndodhemi, per ofrimin e nje sherbimi mjekesor sa me te plote e te specializuar, ne zbatim te Urdhrit nr. 147 dt.08.03.2020 të Ministit të Ministrisë së Shëndetësisë dhe Mbrojtjes Sociale “Per nderprerjen e e nderhyrjeve kirurgjikale te planifikuara ne QSUNT dhe SUSHN” dhe vendimit te mare nga Komiiteti i Kontrollit te Infeksioneve Spitalore, sipas te cilit ne spital do te behen shtrime vetem per rastet emergjente.
Si pasoje e faktit qe shtrimet dhe nderhyrjet do jene vetem per raste emergjente, lutem qe deri neser (e Marte dt. 10.03.2020) te me nisni listen e stafi infermieror dhe sanitar te cilet do te suportojne punonjesit e stafit te Sherbimit Infektiv. Numri i personelit qe duhet te raportohet per te qene ne dispozicin te Sherbimit Infektiv duhet te jete jo me pak se 30% e forces tuaj punetore dhe jo ne KEMP.
Sqarojme qe kjo eshte nje situate e perkohshme per te gjithe. @Administratoret lutem neser te raportoni listen perfundimtare te stafit infermieror dhe sanitar, qe do te merni nga secili sherbim/pavion”.
Ky email i është dërguar administratorëve të cilët duhet të paraqesin listat menjherë në ditën e sotme, por skandali është se pritet që 30 % e stafit infermieror dhe sanitar të kalojë direkt në shërbim në Spitalin Infektiv, ndonëse ata janë të patrajnuar.
QSUT kishte kohë për trajnimin e personelit shtesë që para tre javësh, ku sëmundja e rëndë infektive coronavorus u përhap frikshëm nga Kina në Europë dhe veçanërisht në Italinë fqinje. Ndërsa drejtuesit e QSUT-së dhe Ministrisë së Shëndetësisë jenin spektakël televiziv me gjoja “masat e marra” dhe ambientet e përgatitura për karantinë, vetëm ditën e djeshme kërkohet personel shtesë emergjent, pa asnjë trajnim në sëmundjet infektive.
Skandali pason tjetër skandal… Edhe në momentin që një pjesë pavionesh kanë paraqitur listat, ka pasur ndërhyrje për t’i hequr, madje mësohet se kanë shpërthyer telefonatat edhe nga persona “influentë” në administratën e lartë shtetërore, të cilët kërkojnë që të afërmit apo miqtë e tyre të mos “duken nga Infektivi”.
Në mungesë të listave të para, burime nga mjekë dhe infermierë i thanë Boldnews.al se po detyrohen infermierë dhe sanitarë të cilat nuk “kanë miq në parti” që të jenë të gatshëm për të shërbyer në Spitalin Infektiv, edhe pa u trajnuar. Në rast se ata do të refuzojnë, po kërcënohen deri në largim nga puna.
Shumë nga stafi infermieror dhe sanitar që shërbejnë në pavione të tjerë (jashtë Spitalit Infektiv) shprehen se nuk refuzojnë detyrën, por janë të papërgatitur dhe se më parë QSUT duhet të kishte kryer trajnime bazë sesi mund të veprojnë në raste emergjente dhe përhapjes më të shpejtë të coronavirusit.
