Presidenti Ilir Meta ndodhet në Shkodër ku ka zgjedhur të ndjekë ndeshjen e basketbollit për meshkuj Vllaznia-Tirana. Kreu i shtetit është pyetur nga gazetarët për draftin paraprak të publikuar nga Komisioni i Venecias.
Duke ironizuar në mënyrë indirekte mazhorancën, Presidenti Ilir Meta tha se nuk mund të komentojë mbi raportin paraprak të Komisionit të Venecias për çështjen e emërimit të anëtarëve të Gjykatës Kushtetuese pasi mbi të ka pasur konfidencialitet.
“Nuk e komentoj se mbi dokument kam pasur një konfidencialitet por unë ua kam thënë që më përpara që Kushtetutën tonë, sidomos për Gjykatën Kushtetuese e ka shkruajtur vetë Venecia”, tha Meta.
“Nuk mendoj se kjo është çështje e Venecias sepse Kushtetutën e Shqipërisë Venecia e ka shkruajtur. Kjo ka qenë dhe mbetet që prej 115 ditësh çështje e drejtësisë, e hetimit që të bëjë veprimet e duhura që askush në Shqipëri të mos dalë mbi Kushtetutën dhe ligjin”, shtoi ai.
