Dhuna ndaj grave vazhdon ende në vendin tënd. Ato ende konsiderohen inferiore ndaj burrave në çdo aspekt të shoqërisë dhe iu mohohen shumë të drejta.
Nesër, më 8 mars, “Dita Ndërkombëtare e Gruas”, vajzat dhe gratë shqiptare kanë vendosur të dalin në shesh në shenjë proteste, për të drejta e mohuara dhe për barazi gjinore.
Në orën 11:00 ato do të marshojnë nga Drejtoria e Përgjithshme e Policisë drejt Kryeministrisë.
Lëvizja për Universitetin përmes një reagimi në faqen e saj në rrjetet sociale iu ka bërë thirrje të gjitha vajzave të bashkohen në këtë marshim.
Postimi i Lëvizjes për Universitetin:
Historia nuk ka qenë e lehtë për vajzat dhe gratë. Që ne të fitonim disa të drejta të thjeshta njerëzore; si e drejta për të shkuar në shkollë, për të votuar, për t’u punësuar dhe për jetë kulturore, është dashur një luftë e gjatë mbi një shekullore, e cila vazhdon edhe sot.
Sepse vajzat dhe gratë, pavarësisht të drejtës për arsimim, nëse nuk kanë para përfundojnë në fabrikë këpucësh e në martesa të detyruara. Pavarësisht të drejtës për punësim, janë të papuna e nëse janë të punësuara janë të keqpaguara. Pavarësisht të qenit të barabartë para ligjit, policia dhe gjykata i braktis, karshi burrave e shefave dhunues.
Pabarazia e kthyer në sistem, i ka degdisur gratë dhe vajzat në qytetare të dorës së dytë.
Prandaj, ne vajzat që kemi fatin të studiojmë, e kemi për detyrë të dalim në protestë dhe të ngremë zërin jo vetëm për veten tonë, por edhe për të gjitha vajzat e gratë që nuk kanë zë e fuqi për të shprehur publikisht dhimbjen dhe zemëratën e tyre.
Marshojmë për 8 Mars, të dielën në ora 11:00, nga Drejtoria e Policisë drejt Kryeministrisë.
