Portieri i Bylisit, kapiteni Isli Hidi, edhe pasditen e sotme u bë protagonist në humbjen 2-1 të ballshiotëve në fushën e Laçit. Pikërisht një gabim në dalje dhe grushtim nga portieri veteran bëri që kurbinasit të përfitonin dhe të realizonin. Hidi e grushtoi topin shumë lehtë duke e lënë në zemër të zonës dhe Rrapo përfitoi në të 86′ duke e shtyrë në portën e boshatisur.
Ekipi mallakastriot vazhdon kështu që të mos fitojë dhe viti 2020 e ka parë ende pa asnjë triumf. Plot tetë ndeshjet e fundit kanë sjellë vetëm 5 pikë te ekipi i trajnerit Dovedan, që ka reaguar për “Supersport” duke hedhur fajin te portieri.
“Normalisht më vjen keq që nuk e fituam ndeshjen, në një ndeshje që e humbëm në këtë mënyrë, për shkak të dy gafave nga portieri jonë. Nuk kam çfarë të bëj më shumë, ndoshta nga ndeshja e radhës do i besoj portierit tjetër, pasi u bënë disa ndeshje me këto gafa”.
“Kemi qenë një ekip që e kishin të vështirë të tjerët të na shënojnë. Kur pëson gola të tillë është e vështirë për tu kaluar ky moment. Hidi është portier shumë i mirë, por nuk po e kuptoj se çfarë ka ndodhur me atë këtë muaj”.
