Nga Boldnews.al
Arben Isaraj, një figurë politike që ka qenë gjithnjë pas Edi Ramës, ka zgjedhur që të godasë manifestimin e Presidentit Ilir Meta, duke mbrojtur paralelisht Fatmir Xhafajn dhe vëllain e tij trafikant, Agron (Geron) Xhafaj.
Në një status në rrjete sociale, ku mëtonte të ironizonte organizimin popullor të Presidentit, Isaraj ka vendosur që të evokojë procesin “Geron”, të cilën ai e etiketon “Babale”.
“Na ishte një kohë kur opozita rrugore përgatiti Babalen e drogës ‘të bënte’ si zëri i Agronit për të rrëzuar maxhorancën. Maxhoranca nuk ra dhe opozita e ‘zëri’ i saj po ndëshkohen sipas ligjit penal”, shkruan ndër të tjera Isaraj në profilin e tij në rrjetin social.
Arben Isaraj, i cili prej kohës kur drejtonte Drejtorinë e Targave kishte “humbur” nga tregu mediatik, vendosi të rikthehet “fuqishëm”, në goditje të opozitës, duke mbrojtur vëllain trafikant të ish-ministrit të Brendshëm, Fatmir Xhafaj.
Duket se Operacioni Forca e Ligjit (OFL) ka bërë bashkë Arben Isarajin dhe Fatmir Xhafajn, për shkak, ndoshta, të faktit se mund të jenë të dy subjekte verifikimi nga struktura “me syze” e Policisë së Shtetit.
Xhafaj dhe Isaraj kanë një të përbashkët shumë të madhe, përballe OFL-së. Të dy kanë vëllezër të dënuar për vepra penale në fushën e drogës. Agron (Geron) Xhafaj është i dënuar për trafik ndërkombëtar narkotikësh në Itali.
Altin Isaraj, vëllai i Arben Isarajit, është arrestuar gjithashtu për narkotikë. Nëse OFL-ja e Sandër Lleshajt do të “guxojë” të kërkojë burimin e pasurisë së Geronit dhe Altinit, atëherë automatikisht, do të duhet të kryhen verifikime edhe për Fatmir Xhafajn dhe për Arben Isarajin, si “persona të lidhur” me të dënuarit për drogë.
Ndoshta, shndërrimi në subjekte të mundshëm të OFL-së Lleshajt, i ka bërë bashkë vëllezërit Isaraj dhe vëllezërit Xhafaj.
E, nëse OFL-ja do të marrë “guximin” të kërkojë ligjshmërinë e pasurisë së Fatmirit dhe Arbenit, ndoshta mund të kenë të drejtë të shqetësohen.
“Boldneës.al” ka raportuar më parë për pasurinë e madhe në posedim të Fatmir Xhafajt. Ndërkohë, Arben Isaraj, në rast se OFL i troket në derë, do të duhet të japë sqarime të detajuara, ndër të tjera, edhe për disa episode personale.
Fjala vjen, ai do të duhet të sqarojë publikisht se kush është personi bamirës që i dhuroi disa qindra mijëra dollarë për të përballur një problem të madh shëndetësor që ai ka pasur vite më parë. Bashkë me emrin e personit, do të duhet, me shumë mundësi, të sqarojë edhe nëse ai bamirës ka përfituar nga pushteti që ka pasur Arben Isaraj.
Po ashtu, Isaraj, ndoshta do të duhet të argumentojë që pasuria e tij është e ligjshme dhe nuk është e krijuar, fjala vjen, nga komisionerët e emëruar prej tij në drejtoritë e Targave në Vlorë, Fier, Tiranë, e të tjerë.
