Operacioni Forca e Ligjit i ka dërguar ditën e sotme formularët e vetëdeklarimit dy shtetasve me banim në Tiranë, në kuadër të operacionit anti-KÇK, të nisur prej fillimit të shkurtit.
Sipas burimeve zyrtare, në vijim të veprimeve, bazuar në Aktin Normativ, OFL u ka dërguar kërkesat për vetëdeklarim të pasurisë, shtetasve: A.H., i dënuar për veprat penale “Vrasja me paramendim, në bashkëpunim”, “Armëmbajtja pa leje” dhe “Prodhimi dhe shitja e narkotikëve” dhe E.K., i dënuar për veprat penale “Vrasja me paramendim, e kryer në bashkëpunim” dhe “Armëmbajtja pa leje”;
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme”, thuhet në njoftimin e OFL-së.
Burime bëjnë me dije se këta shtetas janë Aurel Hoxhallari dhe Elidon Kotorri.
Kush është Aurel Hoxhallari?
Ai dyshohet për organizimin e vrasjes makabre të Devi Kasmit. Ai së bashku me kushëririn e tij Elton Hoxhallari dyshohet se kontaktuan me Eftimius Eftimius, vrasësi me pagese nga Greqia i cili ishte gjithashtu ish pjesëtar i Forcave Speciale Greke.
Gjithashtu në vitin 2015, Aurel Hoxhallari dhe kushëriri i tij janë arrestuar nga ana e Policisë si porositës të dyshuar për vrasjen e Pajtim Sejranit, në “Rrugën e Kavajës” në Tiranë.
Por Gjykata e Krimeve të Rënda i la ata të lirë për mungesë provash.
Dy kushërinjtë Hoxhallari dyshohet se kishin porositur Artur Bazen për të eliminuar Pajtim Serjanin. Baze u vra më pas nga miku i Serjanit, efektivi Roland Meta.
Sikur të mos mjaftonte kjo, mbi Hoxhallarin rëndojnë akuza se ai ka qenë baron i drogës në Spanjë.
Kush është Elidon Kotorri?
Gjatë viteve 2000, Elidon Kotorri ishte një nga emrat më të lakuar të drejtësië. Ai u akuzua për një krim të dyfishtë të vitit 1999 (ku u vranë Sentilian Elezi dhe Fatmir Hodaj), ndërsa akuza për vrasje për të cilën u shpall fajtor sipas gjykatës së Strasburgut u konsiderua me prova të marra arbitrarisht.
Krimi i trefishtë ndodhi më 11 janar të vitit 2000 në afërsi të shkollës “Vasil Shanto”. Në shenjester ishte viktima Andi Hasani. Përveç tij në këtë atentat u vranë edhe dy të tjerë, Gazmend Zeneli dhe Sokol Alushi, si dhe mbeti i plagosur Grigor Stefani.
Sic rezultoi gjatë gjykimit, Andi Hasani kishte qenë edhe një herë tjetër shënjestra e një breshërie me armë, nga të cilat ai vetëm u plagos bashkë me dy të tjerë. Por u vranë Sentiljan Elezi dhe Fatmir Hodaj. Ky atentat i dështuar ndodhi më 23 dhjetor 1999, në Tiranën e asaj kohe ku disa grupe ishin krijuar dhe që kishin nisur asgjësimin e kundërshtarëve.
Elidon Kotorri, pothuajse dy dekada më vonë ja arriti të shikojë lirinë. Nga një i dënuar i përjetshëm ai u përpoq në gjykatën e Strasburgut dhe fitoi rishikim të çështjes. Pas rishikimit ai fitoi zbritje të dënimit të përjetshëm dhe dënimin me 25 vjet burgim për vrasje të cilat tronditën kryeqytetin.
