Nxënësit që përfundojnë ciklin e detyruar arsimor (9-vjeçaren) do t’i nënshtrohen provimeve në muajin qershor.
Sezoni i provimeve nis me Gjuhën e huaj, më 16 qershor, për të vazhduar tri ditë më vonë me lëndën e Gjuhës Shqipe dhe në mbyllje Matematika, në datën 23.
Referuar urdhërit të Ministrisë së Arsimit, kohëzgjatja, monitorimi dhe vlerësimi i testeve për minimaturantët, u nënshtrohet të njëjtave rregulla si provimet e maturës.
Nxënësit do duhet t’u përgjigjen 50 pyetjeve me alternativa dhe me shtjellim për dy orë e gjysmë. Paraqitja në shkollë duhet të bëhet një orë e gjysmë më përpara orës 10:00 kur nis provimi.
Ata që s’marrin minimumin e pikëve për të qenë kalues, kanë shans për t’i dhënë ato në sesionin e vjeshtës, i cili zhvillohet në fund të muajit gusht.
Të pakënaqurit me vlerësimin e korrigjuesve kanë të drejtë të marrin një kopje të tezës ku shikojnë përgjigjen e dhënë dhe vlerësimin për çdo pyetje, por jo më vonë se pesë ditë pasi kanë marrë rezultatin.
Sa i takon provimit të Gjuhës së huaj, që është specifik për çdo shkollë, lista e gjuhëve që mund të jepen si provim i detyruar, janë: Anglisht, Italisht, Frëngjisht dhe Gjermanisht. Testi hartohet në përputhje me gjuhën që është në planin mësimor të minimaturantit, e cila zhvillohet në nivelin gjuhësor A2.
Nxënësit e klasave të 9-a të shkollave mbështetëse të seksioneve dygjuhëshe italiane, gjermane dhe franceze japin provim gjuhë përkatëse të seksionit, por në të njëjtin nivel vështirësie, A2.
Për institutin e nxënësve që nuk shikojnë “Ramazan Kabashi”, drejtoria e këtij instituti tërheq testin në QSHA një ditë para zhvillimit të provimit dhe e kthen atë në sistemin e shkrimit brail.
Ashtu si edhe në provimet e Maturës Shtetërore, edhe për ata që përfundojnë klasën e 9-të rregullat mbeten të njëjta: kopja, komunikimi verbal apo qoftë edhe mbajtja e telefonit në mjediset e provimit dënohet.
Nxënësve u lejohet vetëm stilolapsi dhe çertifikata personale.
