Më herët Giuseppe Marotta, hodhi akuza të forta drejt Ligës Italiane të Futbollit për falsifikim të kampionatit. Komentet erdhën pas anulimit të ndeshjes mes Juventusit dhe Interit, e programuar për tu luajtur mbrëmjen e sotme por që u shtye për në datën 13 maj.
Marotta deklaroi se ky vendim qartësisht dëmtonte skuadrën e Interit, sidomos nga ana psikologjike pasi për momentin Interi ndodhet në vendin e tretë pas Lacios dhe Juventusit.
Ndaj kësaj deklarate ka reaguar dhe presidenti i Ligës Italiane të Futbollit, Paolo Dal Pino. Ai ka theksuar se ka menduar vetëm për të mirën e përbashkët të Serisë A dhe jo të një apo dy klubeve të veçanta.
Por ajo që është më interesante, është që Dal Pino, ka thënë që Interit i është ofruar që sfida të luhet të hënë në mbrëmje (ditën e nesërme) me tifozë, por kjo ide është refuzuar totalisht nga zikaltrit, ndaj dhe ka vendosur të shtyjë të gjitha ndeshjet pa tifozë, për të mos dëmtuar imazhin e kampionatit Italian.
“Marotta bën mirë të mos ankohet e hedhë akuza, por të marrë përgjegjësitë që i takojnë. Unë ofrova që sfida të shtyhej për të hënën dhe të luhej me tifozë, por Interi refuzoi kategorikisht, ndaj më pas vendosëm shtyrjen e të gjithë takimeve. Unë nuk shikoj interesin e njërit apo tjetrit klub, por të Serisë A në total dhe luajtja e ndeshjeve pa tifozë, dëmton imazhin e kampionatit tonë. Në të tilla raste është e vështirë të gjesh dakordësim me të gjithë klubet”, deklaroi Dal Pino.
