Në supersfidën mes Tiranës dhe Partizanit të zhvilluar mbrëmjen e djeshme, momenti i cili ndryshoi gjithçka ndodhi në minutën e 14-të. Torassa doli i vetëm brenda zonës ndërsa teksa ndjen dorën e zgjatur të Eneo Bitrit, rrëzohet brenda zonës së rreptësisë.
Arbitri akordon menjëherë 11-metërsh, ndërsa pas një konsultimi me ndihmësit e tij ai akordon edhe kartonin e kuq për Bitrin.
Faulli brenda zonës qëndron, këtë e pranoi edhe Sormani pas ndeshjes por ajo që ka sjellë reagime është pikërisht kartoni i kuq. Por ky vendim sipas rregullores është i drejtë, pasi mbrojtësi i Partizanit duke mos qenë i interesuar për topin, shkakton faull duke i hequr mundësinë e shënimit të lojtarit të Tiranës.
Ja çfarë thotë rregullorja e arbitrimit për këtë rast:
“Mohimi i një goli apo një mundësie të qartë të shënimit të golit.
Kur një lojtar i mohon skuadrës kundërshtare një gol ose një mundësi të pastër shënimi duke prekur topin me dorë, lojtari do të përjashtohet pavarësisht ku ndodh shkelja.
Kur një lojtar bën shkelje kundër një kundërshtari brenda zonës së tij të penalltisë, e cila i mohon kundërshtarit një mundësi të qartë të shënimit të golit dhe arbitri akordon një goditje nga penalltia, lojtari fajtor ndëshkohet (KV) në qoftë se shkelja/faulli ishte një përpjekje për topin: në të gjitha rrethanat e tjera (p.sh. mbajtja, tërheqja, shtyrja, nuk ka mundësi për të luajtur topin etj.) lojtari fajtor duhet të përjashtohet”.
