Autori i vrasjes së dyfishtë në Rrëshen mbrëmjen e djeshme, Fatmir Kolecaj ende nuk është vënë në pranga nga policia.
Sot autoritetet kanë publikuar foton e autorit dhe kërkojnë ndihmën e qytetarëve. Policia ofron 5 milion lekë për këdo që jep informacion të saktë mbi vendndodhjen e tij, por nuk saktëson nëse bëhet fjalë për (të reja apo të vjetra). Interesimit të “Boldnews“, Policia nuk iu përgjigj.
Mbrëmjen e djeshme, në Kodër Rrëshen, Mirditë, rreth orës 20.40, në oborrin e banesës, ai vrau me armë zjarri Vladion dhe Esmeralda Filopatin (motër dhe vëlla). Esmeralda, ishte nënë e tre fëmijëve, e cila ishte divorcuar nga Fatmir Koleci.
Si ndodhi vrasja e motër dhe vëlla këtë mbrëmje në Rrëshen?
Fillimisht Fatmir Koleci ka rrëmbyer armën e zjarrit dhe është nisur drejt familjes Filopati, ku ndodhej dhe ish-bashkëshortja e tij. Në derën e shtëpisë ka dalë vëllai i kësaj të fundit, Vladion Filopati, i cili është konfliktuar fillimisht me Kolecin.
Më pas ka dalë dhe Esmeralda e cila është përfshirë në konflikt. Në këtë moment, Fatmir Koleci ka qëlluar me armë zjarri duke lënë të vdekur në oborr të shtëpisë, ish-bashkëshorten Esmeralda, dhe ish-kunatin e tij Vladion Filopati. Kujtojmë se viktima Esmeralda Filopati ishte nënë e tre fëmijëve.
Njoftimi i Policisë:
Vijon krehja e zonës për lokalizimin, kapjen dhe arrestimin e autorit të dyshuar të vrasjes së dyfishtë të ndodhur mbrëmjen e djeshme, në Kodër Rrëshen.
Forcat RENEA, FNSH dhe strukturat e Drejtorisë Vendore të Policisë Lezhë kanë vijuar pa ndërprerë kontrollin e territorit dhe të vendeve të dyshuara ku mund të fshihej autori i dyshuar i ngjarjes.
Ndërkohë, grupi hetimor, nën drejtimin e prokurorisë ka kryer të gjitha veprimet procedurale dhe dokumentimin e ngjarjes.
Për të bërë të mundur kapjen sa më parë të autorit të dyshuar të kësaj ngjarjeje, Drejtoria Vendore e Policisë Lezhë vë në dispozicion 5 milion lekë për këdo që jep informacion të saktë mbi vendndodhjen e autorit.
Cilido që disponon informacion të vlefshëm për autorin e dyshuar, shtetasin Fatmir Kolecaj, 47 vjeç, banues në fshatin Zejmen, Lezhë, të telefonojnë në numrin 069 41 06 449 dhe në numrin pa pagesë 112 apo në Komisariatin Dixhital, duke i siguruar anonimat të plotë dhe të sigurt.
