Një 50 vjeçar nga Vlora është vënë në pranga nga policia kufitare e Rinasit pasi ishte person në kërkim ndërkombëtar dhe përdorte gjeneralitete të rreme për t’iu shmangur arrestimit.
Ai u dyshua në momentin e intervistimit në Rinas, kur u deportua nga Spanja së bashku me 25 shqiptarë të tjerë pasi kishin shkelur rregullat e qëndrimit në hapësirën Schengen apo që kishin kërkuar azil.
Por gjatë intervistimit në Rinas, policia kufitare dyshoi se njërin prej tyre përdorte gjeneralitete të rreme. Pas hetimit ai u vu në pranga pasi i kishte dhënë policisë spanjolle gjeneralitete të rreme.
Sipas policisë, “gjatë intervistimit të tyre rezultoi se një nga personat kishte dhënë identitet të rremë në shtetin spanjoll, me emrin V. B. Gjatë procesit të verifikimit u bë e mundur që të zbulohej identiteti i vërtetë i tij, i cili nuk ishte shtetasi V. B., por ishte në të vërtetë ishte shtetasi K. J., 50 vjeç, lindur dhe banues në Mifol, Vlorë”.
Ky shtetas i kishte dhënë policisë spanjolle gjeneralitete të rreme, për arsye se ishte person në kërkim ndërkombëtar, i shpallur nga Interpol Roma, i dyshuar për veprat penale “Trafikim i narkotikëve” dhe “Grup i strukturuar kriminal”.
Në përfundim të procedurave të verifikimit, Policia Kufitare e Rinasit, në bashkëpunim me Interpol Tiranën bëri arrestimin e 50-vjeçarit, me qëllim ekstradimi dhe Interpol Tirana vijon procedurat për ekstradimi e tij drejt Italisë.
