Deri në orën 09:55 të mëngjesit të sotëm në Shqipëri nuk ka pasur asnjë rast të koronavirusit. Kjo u pohua nga ministrja e Shëndetësisë, Ogerta Manastirliu, gjatë takimit të Task Force.
Ajo tha se edhe për rastet e dyshuara, ISHP, pas analizave të kryera, ka dalë në përfundimin se s’ka raste të koronavirusit në Shqipëri.
“Jemi të përgjegjshëm dhe duhet të ecim me transparencë maksimale me publikun, për të gjitha masat që jemi duke ndërmarrë. Komunikimin me publikun e kemi thelbësor për të shmangur çdo dezinformim. Edhe dje jo pak mesazhe kanë qarkulluar që kanë nxitur panik. Nuk është koha që paniku t’i zë vendin arsyes. Është koha të vlerësojmë dhe dëgjojmë ekspertët, që në Shqipëri nuk mungojnë, të cilët po ndjekin planin e veprimit të miratuar nga tas-forca dhe strukturat në qeverinë shqiptare. Dua t’iu ftoj si media për t’iu pasur bashkëpunëtorë ashtu si dhe qytetarë, në një situatë që nuk kërkon panik, por përgjegjësi, transparencë dhe racionalitet. Jemi përballur dje me mesazhe të rreme, të cilat menjëherë kemi informuar nëpërmjet Ministrisë për jo vërtetësinë e tyre”, tha ajo.
Manastirliu tha se pas shfaqjes së COVID 19 në Itali është dyfishuar kontrolli në të gjitha pikat e kalimit kufitar të Shqipërisë, ndërsa sistemi shëndetësor është në gjendje gadishmërie për situatën e krijuar në shumë prej vendeve.
Ajo kërkoi nga mediat që të shmangin përhapjen e lajmeve të rreme që shkaktojnë panik te qytetarët.
“Kemi shtuar masat higjeno-sanitare në strukturat arsimore, përfshi këtu edhe ccerdhet dhe kopshtet”, tha Manastirliu.
