16 000 euro janë sekuestruar në doganën e Rinasit dhe është proceduar penalisht poseduesi për mosdeklarim të parave.
“Policia Kufitare e Rinasit, pas dyshimeve të lindura në lidhje me motivin e udhëtimit ka kaluar për kontroll në vijën e dytë shtetasin L. Gj., 28 vjeç. Gjatë kontrollit të ushtruar në vijën e dytë punonjësit e Policisë Kufitare i kanë gjetur këtij shtetasi në çantën e brezit një shumë prej 16.000 eurosh të cilat ky shtetas po tentonte t’i kalonte pa i deklaruar para autoriteteve doganore”, njoftoi policia.
“Nga Policia Kufitare e Rinasit u bë sekuestrimi i shumës së eurove në cilësinë e provës materiale dhe në përfundim të veprimeve të para hetimore u proceduar penalisht shtetasi L. Gj., për veprën penale ‘Mosdeklarim i të hollave dhe sendeve me vlerë në kufi’”, shtuan të njëjtat burime.
Më herët, Policia e Gjirokastrës njoftoi sekuestrimin e 34.750 eurove në doganën e Kakavijës dhe procedimin e poseduesit për mosdeklarim të hollash.
