Gjashtë person u arrestuan një ditë më parë në Vlorë për akuzat “Kontrabanda me mallra të ndaluara”, “Menaxhimi i mbetjeve” dhe “Transportimi i mbetjeve”. “Boldnews” zbardh këtë të premte intenerarin e tragetit me mbetje të dyshuara rrezikshme, që u ndalua në portin e Vlorës dhe se si nisi aksioni nga autoritet shqiptare.
Policia njoftoi për aksionin e koduar “Amiant” (si emërtimi i lëndës së dyshuar që është sekuestruar) një ditë më parë, i zhvilluar në bashkëpunim me prokurorinë e rrethit.
“Në bazë të informacioneve të mara në rrugë operative nga strukturat e Departamentit të Policisë Kriminale, se me një traget që ishte nisur nga Italia po transportohej një sasi e konsiderueshme me mbetje të rrezikshme për shëndetin e njeriut dhe ambientin, me qëllim për t’i depozituar në Shqipëri, u organizua puna dhe në bashkëpunim me Policinë vendore të Vlorës dhe atë Kufitare, u finalizua operacioni në kuadër të të cilit u bë arrestimi në flagrancë i 6 personave me banim në Vlorë”, njoftoi policia.
Të njëjtat burime shtuan se, gjatë kontrollit të ushtruar në tragetin e linjës Brindisi – Vlorë dhe konkretisht në pjesën fundore të garazhit, është gjetur dhe sekuestruar me cilësinë e provës materiale një sasi e papërcaktuar mbetjesh të ndaluara e të dyshuara të rrezikshme, për të hyrë në Republikën e Shqipërisë. Në cilësinë e provës materiale, u sekuestrua trageti si dhe sasia e mbetjeve.
Itinerari
Burime pranë grupit hetimor bënë me dije se mjeti lundrues është nisur fillimisht nga brigjet shqiptare për në Greqi, me qëllim për të shkrirë një traget që nuk ishte më në funksion. Pasi nuk janë lejuar nga autoritet greke, janë nisur për në Itali, por as atje nuk u është lejuar shkrirja, duke qenë se në vendet e Bashkimit Europian, është e ndaluar shkrirja e mbetjeve të tilla, pasi konsiderohen të rrezikshme.
Megjithatë, në Itali kanë bërë çmontimin e tragetit që dyshohet se e kanë sjellë në Shqipëri me anë të disa rrugëve.
Policia njoftoi se aksioni që çoi në 6 arreste, nisi “në bazë të informacioneve të mara në rrugë operative nga strukturat e Departamentit të Policisë Kriminale”. Ndërkaq, burime pranë grupit hetimor saktësojnë se ishin autoritet greke që njoftuan homologët e tyre në Shqipëri.
Të arrestuarit
Në pranga u vunë 6 persona: Zamir Kormuzi, 45 vjeç, pronar i një firme grumbullimi të mbetjeve, Elisabeta Çuni, 55 vjeçe, administratore e firmës së mbetjeve, Arbër Çuni, 28 vjeç, Kujtim Xhafellari, 65 vjeç, Zv. kapiten i tragetit, Festim Tafa, 71 vjeç, kapiten i tragetit dhe 48-vjeçari me iniciale A.G..
/Boldnews.al/
