Një nga mesazhet më të ashpër të Presidentit, Ilir Meta në kontradiktën e tij me qeverinë, është akuza se qeveria është duke kryer një grusht shteti. Kreu i Shtetit ka bërë të ditur se ai do të prezantojë në një seancë të jashtëzakonshme të Komisionit të Venecias argumentet pse sipas tij, qeveria është duke e kryer këtë puç institucional.
Por, cilat janë tetë akuzat që radhit Presidenti Meta si prova se qeveria Rama është vërtet duke kryer grusht shteti.
Argumenti i parë është ai që nga Presidenca konsiderohet manipulimi i zgjedhjeve lokale dhe parlamentare. Presidenca radhit ndër elementët e kësaj akuze, rastin e zgjedhjeve vendore të Dibrës dhe Durrësit, përgjimet e revistës gjermane “Bild”.
Argumenti i dytë është shkelja e dekretit të presidentit për anulimin e zgjedhjeve vendore të 2019. Këtu presidenca akuzon shumicën socialiste të KQZ-së, se ka marrë kompetencat e Gjykatës Kushtetuese duke anuluar një dekret presidencial.
Argumenti i tretë është organizimi i zgjedhjeve vendore një partiake më 30 qershor, të cilat sipas presidencës edhe pse ishin moniste, sërish shënuan parregullsi të shumta ligjore dhe teknike.
Argumenti i katërt i presidentit është ekzistenca e një parlamenti një partiak dhe pa numrin e plotë të deputetëve. Presidenti e konsideron shkelje faktin që institucioni ligjvënës rezulton me 122 deputetë në vend të 140 që sanksionohen në Kushtetutë.
Argumenti i pestë është në këndvështrimin e presidentit uzurpimi i Këshillit të Emërimeve në Drejtësi, nga kreu i saj Ardian Dvorani. Për presidentin, kryetari në fjalë i këtij institucioni të rëndësishëm ka kryer një mori shkeljesh dhe nuk do të duhej të mbante këtë pozicion.
Argumenti i gjashtë i Presidentit Meta vjen nën titullin: Uzurpimi i hetimit dhe dublimi i SPAK nga policia. Presidenti kritikon paketën speciale anti-KÇK si hetuesi në përbërje të ekzekutivit.
Argumenti i shtatë lidhet me paketën antishpifje, e cila sipas z. Ilir Meta cenon lirinë e medias në Shqipëri.
Ndërsa argumenti i tetë dhe i fundit, është ndryshimi i miratuar së fundi i procedurës së betimit të anëtarëve të Gjykatës Kushtetuese, duke i hequr presidentit këtë kompetencë që ia garantonte deri tani Kushtetuta.
Akuzat që radhit Presidenti Meta si prova se qeveria Rama po tenton kryerjen e një grushti shteti:
1. Manipulimi i zgjedhjeve lokale dhe parlamentare
2. Shkelja e dekretit të Presidentit për anulimin e datës së zgjedhjeve vendore 2019
3. Zgjedhje vendore një-partiake
4. Parlamenti një partiak dhe i paplotë
5. Uzurpimi i KED nga Adrian Dvorani
6. Uzurpimi i hetimit dhe dublimi i SPAK nga policia
7. Lufta kundër lirisë së shprehjes
8. Ndryshimi antikushtetues i betimit të gjyqtarëve.
Presidenti i Republikës, Ilir Meta në një deklaratë të dhënë dje për mediat, është shprehur se, më 2 mars do të firmosë dekretin e parë për çmontimin e atij që ai e konsideron “grupin organizator të grushtit të shtetit ndaj reformës në drejtësi”.
“Nga data 2 mars, kur do të firmoset dekreti i parë kundër grushtit të shtetit dhe në shpartallim të plotë të këtij grushti shteti, pikërisht para popullit shqiptar në bulevardin “Dëshmorët e Kombit” do të lidhim një besëlidhje për të shpartalluar njëherë e mirë regjimin e oligarkëve dhe mafies ndërkombëtare, që ka dhunuar sovranitetin kombëtar me qëllim shpopullimin e këtij vendi dhe shndërrimin e tij në një qendër pastrimi të parave, në një bazë operacioneve të krimit të organizuar, kombëtar dhe ndërkombëtar”, deklaroi z. Meta./euronews.al
