Nga Seksioni për Hetimin e Krimeve ndaj Personit dhe Pasurisë në DVP Shkodër u bë ekzekutimi i urdhrit të ndalimit për shtetasin Artur Lushi 45 vjeç, banues në fshatin Berdicë e Madhe, Shkodër.
Gjykata e Shkallës së Parë Shkodër, me vendimin datë 08.05.2018, i ka vendosur masën e sigurimit “Arrest në burg”, për veprat penale “Vrasja me dashje e mbetur në tentativë” dhe “Armëmbajtja pa leje”, pasi ky shtetas, më datë 05.05.2018, dyshohet se ka plagosur me armë zjarri shtetasin Xhevat Vataksi, 62 vjeç, banues në Shkodër.
Ngjarja
Biznesmeni Xhevat Vataksi është qëlluar për t’u vrarë, teksa autori ka shtënë në drejtim të tij gjashtë herë, tre nga plumbat prekën pjesën e poshtme të trupit të tij. Me këtë konkluzion kanë dalë ekspertët, të cilët kanë hetuar ngjarjen në Bërdicë të Shkodrës.
Bazuar edhe tek dëshmitë debati mes biznesmenit Xhevat Vataksi dhe autorit të dyshuar, Artur Lushi, nisi për shkak se rruga Shkodër-Velipojë prek një pjesë të pronës së Lushit.
Megjithëse Vataksi i ka shpjeguar se është thjeshtë zbatues punimesh si nënkontraktor, kundërshtari nuk është bindur.
Ndaj dy ditë më pas, Artur Lushi, 43 vjeç, pronar i një lokali dasmash në Bërdicë shkoi në kantier, ku makineritë dhe punonjësit e firmës, pronë e shtetasit Vataksi ishin duke punuar në ndërtimin e rrugës.
Ai nisi t’i pengonte dhe në këtë situatë ka mbërritur edhe Vataksi, i cili i kërkoi Lushit të bisedonin.
Por sapo është afruar, autori ka qëlluar me pistoletë në drejtim të tij dhe tre plumba e prekën në këmbë.
Ishin punonjesit e firmës së tij që njoftuan policinë, e cila shpalli në kërkim 45-vjeçarin, kurse Xhevat Vataksi iu nënshtrua një ndërhyrje kirurgjikale.
