Një sherr ka ndodhur paraditen e sotme rreth orës 09:00 në ambientet e Autoritetit Kombëtar të Ushqimit. Drejtori Rajonal i Tiranës, Arbër Nuri është rrahur me grushta me inspektorin e Drejtorisë së Përgjithshme të AKU, Aleksandër Dani. Lidhjet nepotike në administratë janë bërë shkak i grushtave, kërcënimeve dhe sharjet në institucion. Burime bëjnë me dije se shkak për ngjarjen është bërë ndarja e inspektimeve edhe për bashkëshorten e Danit, e cila është punonjëse e AKU për Tiranën.
Burimet sqarojnë se mes Arbër Nurit dhe bashkëshortes së Danit ka patur një konflikt verbal, që ka degraduar në një kërcënim nga ana e Nurit për të, ku ai i ka thënë se do ta heqë nga puna, sapo të kalojë në punësimin me Kod Pune. “Do të të flak si leckë jashtë dhe do të të të ****”, “i ka thënë drejtori vartëses, dhe kjo ka telefonuar menjëherë të shoqin, Aleksandrin, i cili gjithashtu punon në AKU. Sapo Dani ka shkuar në institucion ai është qëlluar me Nurin, dhe debate ka degraduar në grushta.
Dosja.al kontaktoi edhe me bashkëshorten e Aleksandër Danit, e cila është shprehur se: “Për çdo gjë flisni me Arbërin (Drejtorin), flisni me atë”), duke mos pranuar të flasë, por duke mos-mohuar sherrin që ka ndodhur në këtë institucion.
Ndërsa vetë Aleksandri, u përgjigj se: Mos shqetësoni njerëzit kot me këto lajme. I pyetur nëse a ishte sot në ambientet e AKU në Tiranë, ai nuk pranoi të përgjigjej.
Nga ana tjetër ne provuam disa herë të kontaktonim me Arbër Nurin përmes telefonit, por drejtori rajonal nuk e ka hapur telefonin, pasi ndoshta po mban akullin ende tek plagët. Dëshmitarë të sherrit sqaruan se e gjithë ngjarja është filmuar nga kamerat e sigurisë, ku shihet Dani i mavijosur nga rrahja.
Megjithatë, ftojmë të dyja palët për një reagim, sapo të përfundojnë trajtimin mjekësor me betadinë nga grushtat./Dosja.al
