Punonjësit e nënstacionit elektrik dhe të pompimit të Poçemit në Ballsh kanë nisur grevën e urisë. Ata deklarojnë se arsyeja është për shkak të mos marrjes së 27 pagave. Janë 7 punonjës, të cilëve do tu bashkohen edhe 16 punonjës të tjerë. Greva e urisë vjen pas protestave të tyre.
“I kemi ezauruar të gjitha mundësitë. Asnjë nuk na ka dhënë zgjidhje. Jemi të detyruar të arrijmë në këtë fazë”, tha një punëtor i nënstacionit.
Ata thonë se i kanë njoftuar të gjitha instancat e shtetit për situatën. Thonë se do të qëndrojnë vetëm si roje, pasi braktisja e objektit të rëndësisë së veçantë i vë para përgjegjësisë ligjore. Punonjësit thonë se do të vazhdojnë grevën deri në marrjen e pagave të prapambetura dhe deri në lidhjen e kontratës së re, pasi në 31 dhjetor atyre i është ndërprerë kontrata.
