Është zbardhur deklarata e Vladimir Gjutës dhënë pas arrestimit, teksa u prangos në afërsi të selisë se PS-së.
Gjuta ka treguar që armën dhe një dorezë hekuri i kishte me vete për siguri dhe jo për ndonjë ngjarje raporton “Top Channel”.
“Armën dhe dorezën i kisha për vetëmbrojtje dhe për të ruajtur paratë është shprehur Gjuta”.
Më tej Gjuta ka deklaruar se: “Lekët janë të miat dhe të familjes. Unë gjendesha aty për t’i thyer në dollarë pasi kështu e kishim lënë me familjarët dhe me babanë”. Në total Gjutës iu sekuestruan 121 mijë euro, 27 mijë dollarë amerikanë, 22 mijë paund dhe 664 mijë lekë, ku përfshihen edhe shumat që ju gjetën në banesë.
Vladimir Gjuta pritet të dalë për masë sigurie i akuzuar për kosumimin e tre veprave penale dhe konkretisht për “pastrim të parave”, “armëmbajtje pa leje” dhe “Mbajtje e armëve të ftohta” (doreza). Pistoleta dhe 23 fishekët, tha një burim i laboratorit të kriminalistikës, janë dërguar për ekspertim balistik për të saktësuar nëse ishte apo jo kjo armë në gjendje të rregullt.
