Philippe Coutinho u largua nga skuadra e Liverpoolit në janar të vitit 2018 për të bashkuar me Barcelonën në La Liga.
Pas një viti e gjysmë në Spanjë, ai asnjëherë nuk u bë pjesë integrale e skuadrës në vazhdimësi dhe për pasojë “Blaugranasit” e huazuan me të drejtë shitjeje tek Bayerni i Munihut në gusht të vitit 2019.
Ndërsa në një intervistë të fundit për “Sports Illustrated”, Coutinho deklaron që nuk është penduar për largimin nga Liverpooli skuadër në të cilën po shkëlqente. Braziliani gjithashtu deklaron se nuk habitet nga suksesi i madh që “Të Kuqtë” po arrijnë kohët e fundit.
“Liverpooli po fluturon dhe kjo nuk më befason. E pamë sezonin e kaluar kur fituan Ligën e Kampioneve, ndërsa sezoni që po kalojnë në Premier League nuk është surprizues për mua, pasi ata kanë skuadër të madhe dhe një trajner vizionar”.
“Jam i lumtur për ta, kam shumë miq dhe ish-shokë skuadre atje”.
Ndërsa i pyetur nëse ndjen ndonjë keqardhje për faktin që ai mund të ishte pjesë e këtij suksesi të skuadrës, ai ka thënë: “Nuk më pëlqen të shikoj prapa. Mora një rrugë tjetër dhe tani jetoj një aventurë ndryshe si çdo kush tjetër. Jam i lumtur me atë çfarë kam bërë në të kaluarën dhe tani shikoj vetëm përpara”.
Për Liverpool-in, Countinho shënoi 54 gola në 201 ndeshje por impaktin më të madh e kishte në organizimin e lojës të skuadrës.
