Policia e Shtetit ka publikuar emrat dhe fotot e dy personave të tjerë që janë pjesë e listës “Most wanted” (më të kërkuar në Shqipëri).
Një prej tyre është Barjam Boci i dënuar me burg përjetë.
Në datën 24 qershor 2015, në fshatin Lazarat, Gjirokastër, gjatë një operacioni policor është vrarë me armë zjarri punonjësi i Policisë së Shtetit I. B., si dhe janë plagosur punonjësit J. I. dhe P. H. Shtetasi Barjam Boci ka qenë pjesë e grupit që ka qëlluar në drejtim të Policisë.
Barjam Boci është dënuar me burgim të përjetshëm nga Gjykata e Krimeve të Rënda Tiranë, për veprat penale “Vrasja me dashje në rrethana cilësuese” dhe “Grup i strukturuar kriminal”.
Një person tjetër në kërkim është Alban Baftjari, dënuar me burg përjetë.
Në datën 7 mars 2001, në fshatin Shetel, Shijak, Durrës, shtetasi Alban Baftjari, në bashkëpunim me persona të tjerë, ka shkuar në orët e vona të mbrëmjes, në banesën e shtetasit Xh. B., për të vjedhur dhe ka plagosur rëndë shtetaset Sh. B., S. B. dhe shtetasin Xh. B., i cili për pasojë ka gjetur vdekjen. Alban Baftjari është dënuar me burgim të përjetshëm nga Gjykata e Rrethit Gjyqësor Durrës, për veprat penale “Vjedhja me pasojë vdekjen, në bashkëpunim” dhe “Armëmbajtja pa leje”.
Në kërkim është dhe shtetasi Jashar Begani (Begami), i dënuar me burg përjetë.
Në datën 21 korrik 1997, në zonën e stadiumit “Qemal Stafa” në Tiranë, shtetasi Jashar Begani (Begami) ka vrarë shtetaset A. L. (B.) dhe Z. K. Jashar Begani (Begami) është dënuar me burgim të përjetshëm nga Gjykata e Rrethit Gjyqësor Tiranë, për veprat penale “Vrasja me paramendim” dhe “Armëmbajtja pa leje”.
Lista “Most wanted” përbëhet nga 50 persona të dënuar nga 25 vite burg deri në burgim të përjetshëm për vepra të rënda penale.
Policia bën të ditur se çdo ditë do të publikojë persona qe janë objekt i punës së Njësisë së Kërkimit.
Uniformat blu bëjnë thirrje se në rast se dispononi informacion mbi vendndodhjen e tyre, të njoftoni në “Komisariatin Dixhital” apo numrin falas 112, duke iu siguruar anonimat të plotë dhe reagim të menjëhershëm.
