I dënuar me 30 vite burg me gjykim të shkurtuar në Apel për vrasjen e bashkëshortes, Gjykata e Lartë në Itali i ka ulur dënimin me 10 vite Muhamed Vrapi, tani 64 vjeç.
Gjykata e Kasacionit rrëzoi rrethanën rënduese se autori ka vepruar me mizori edhe pse Muhamedi qëlloi mbi 30 herë me thikë të shoqen Diana, krim i ndodhur në Qershor 2017, raportojnë mediat lokale.
Gjykata arsyetoi se duhet të kihet parasysh nëse goditjet i shkaktuan më shumë vuajtje viktimës dhe sipas gjykatës, edhe pse autori e qëlloi 34 herë, 52-vjeçarja humbi jetën thuajse menjëherë. E thënë ndryshe, “mizoria” e veprimit nuk kishte efekt. Dhe në rastin Vrapi, nuk ka asnjë provë që të vërtetojë se ndodhi ndryshe.
Krimi ndodhi në banesën e çiftit në Busto Arsizio, ku Muhamed Vrapi vrau të shoqen me thikë.
Pas mbërritjes së efektivëve, autori rrëfeu se nuk mund të vepronte ndryshe. Ai më pas do t’u tregonte hetuesve se ishte grindur me të sepse ajo kishte shprehur gatishmërinë për ta lënë pasi zbuloi bisedat e tij në rrjetet sociale me një mike të vjetër. Muhamedi tha se u përpoq t’i shpjegonte asaj se ai nuk kishte asnjë lidhje me atë grua, por diskutimi kishte degjeneruar deri në shpërthim të zemërimit.
Dëshmitarët e prishjes progresive të marrëdhënieve midis prindërve, kohët e fundit, ishin gjithashtu tre fëmijët e çiftit.
Çifti jetonte në Itali prej vitesh.
/BoldNews/
