Juventusi pas fitores ndaj Fiorentinës luan në transfertën e Veronës. Takimi do të mbahet në mbrëmje në orën 20:45 në stadiumin “Bentegodi”, ku verdheblutë nuk munden që nga dueli me Romën, dy muaj më parë. Nën drejtimin e kroatit Ivan Juric Verona është përmirësuar ndjeshëm dhe forcën e këtij ekipi e provoi gjithashtu edhe skuadra e Lacios në mesjavë.
Vendasit pritet të zbresin në fushë me formacionin e tyre më të mirë, pasi trajneri Ivan Juriç nuk ka probleme me mungesat, por sidoqoftë një gjë e tillë mund të influencojë, duke pasur parasysh lodhjen e ndeshjes së mesjavës, ku gjithsesi Verona i rezistoi për plot 96′ furisë së skuadrës së drejtuar nga Simone Inzaghi, për të dalë nga Qyteti i Përjetshëm madje me rrjetën të paprekur, ndonëse përballë kishte një ekip si Lacio, me një mesatare shënimi prej 3 golash për ndeshje në “Olimpico”.
Në krahun tjetër kampionët në fuqi tani fillojnë një fazë shumë të ngjeshur të sezonit, me plot 4 nga 5 sfidat e radhës jashtë fushës së tyre, përpara dy sfidave rresht që do të kenë ndaj klubeve të Milanos, në fillimin e muajit mars. Pas humbjes dhe ndeshjes së shëmtuar me Napolin Sarri premtoi lojë dhe rezultat. Rezultati nuk mungoi, por loja la shumë për të dëshiruar, madje 2 nga 3 golat e realizuar erdhën vetëm nga pika e bardhë e 11-metrave.
Do të jetë edhe një sfidë mes dyshes të pakalueshme Kumbulla-Rrahmani dhe fenomenit portugez Ronaldo, i cili do të kërkojë golin e tij të 10-të radhazi në Serinë A.
Në ndeshjet e tjera të Serisë A bie në sy sfida mes Fiorentinës dhe Atalantës e cila luhet në orën 15:00, ndërsa në fushë zbresin edhe Torino-Sampdoria, ora 18:00.
