Operacioni “Forca e Ligjit” sot u ka nisur formularin dy personazhe të tjerë të botës së krimit për vetëdeklarimin e burimeve të pasurisë.
Një prej tyre është Saimir Taullai, banues në Lushnjë, i dënuar për veprën penale “Prodhimi dhe shitja e narkotikëve”, në bashkëpunim.
Ndërsa “i forti” tjetër nën shënjestrën e OFL është shtetasi Arben Isufaj, njohur ndryshe si ‘Ben Qimja’, banues në Fier, i cili është nën hetim në Itali, për veprën penale “Pjesëmarrja në organizatë kriminale, me qëllim trafikimin e lëndëve narkotike”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për ndjekje të mëtejshme.
Kush është Saimir Taullai?
Saimir Taullai, një biznesmen nga Lushnja, i cili iu ka shpëtuar dy atentatve, në tetor 2017 dhe nëntor 2018. Aktivitetin e biznesit të tij e ka zgjeruar edhe në Greqi dhe Itali.
Në 2015 Saimir Taullau, u arrestua nga policia e Durrësit së bashku me Laert Haxhiun, Afrim Demirin dhe Kastriot Zaimi pasi në makinën e tyre u kap sasia prej 1.2 kg heroinë. Dënimi i fundit për Saimir Taullain është dhënë nga gjykata e Durrësit në vitin 2016 e cila e ka dënuar me 3.8 vite burgim për akuzën e “Prodhimit dhe shitjes së lëndëve narkotike”.
Ai është vëllai i Baki Taullait, i vrarë 15 vjet më parë për shkak të një mos pagese kundrejt një bande.
Familja Taullai njihet si rivale e fortë e Aldo Bares. Në vitin 2005, Baki Taullau u vra, ndërkohë që Saimiri, vëllai i tij, ishte dëshmitar në gjyq, ku ka dëshmuar dhe ka akuzuar si autorë të vrasjes, pjesëtarët e këtij grupi me urdhër të Bares.
Konflikti ka nisur në vitin 1997, kur banda e Aldo Bares rriti influencën në Lushnje. Familja Taullau kishte në pronësi një pikë karburanti dhe disa biznese. Bare kërkoi të rekrutonte në grup Saimir Taullaun, i cili refuzoi. Nga ky moment, banda nisi të vendosë gjoba për familjen, duke përfunduar në vrasjen e Baki Taullaut.
Familja e tij, ka patur gjithnjë përplasje me grupin e Aldo Bares, për shkak të një gjobe të vendosur gati 2 dekada më parë me vlerë 500 mijë euro, p ngjarje ende nuk është zbardhur. Në dëshminë e tij, para gjykatës në vitin 2008, Saimir Taullau, ka thënë se i vëllai i tij, Baki Taullau, ishte pre e gjobave të grupit të Aldo Bares. Siç dëshmonte asokohe Taullau, i vëllai i tij i kishte paguar disa herë gjobat që grupi i Bares i kishte vendosur, dhe kur ai nuk i pagoi më, atëherë atë e vranë.
Kush është Arben Isufaj, njohur ndryshe si “Ben Qimja”?
Arben Isufaj ka një të kaluar kriminale në shtetin italian dhe është dënuar nga Gjykata e Torinos për trafik ndërkombëtar lëndësh narkotike. Ai u arrestua për t’u ekstraduar në Itali në mars 2014, por kërkesa e autoriteteve italiane u hodh poshtë nga Gjykata e Rrethit Gjyqësor Fier.
Arben Isufaj, gjatë viteve 2004 dhe 2005 dyshohet se është marrë me aktivitet kriminale në Hollandë dhe Itali, duke shitur dhe trafikuar sasi të konsiderueshme kokaine dhe heroinë.
Ben Qimja ka punësuar në kompaninë e tij kohët e fundit edhe të liruarin nga burgu, Endrit Doklen, ish pjesëtar i bandës së Durrësit.
Para pak kohësh, në fillim të dhjetorit 2019, i arrestuan xhaxhain Ahmet Isufajt, 56 vjeç, nën akuzat për krim të organizuar dhe shitje narkotikësh nga drejtësia kosovare.
Trafikoi 23 kg kokainë nga Hollanda në Itali
Biznesmeni fierak Arben Isufaj, dyshohet se ka trafikuar nga Hollanda në drejtim të Italisë, një sasi prej 23 kilogramë kokainë. Në grupin kriminal ku bën pjesë Isufaj i përbërë me 11 persona, janë dhe dy korrierë grekë, ndërkohë pjesa tjetër sipas dokumentave italiane kanë qënë shtetas shqiptarë, kryesisht nga qyteti i Fierit. Sasia e drogës e sjellë nga Hollanda në Itali dhe është shpërndarë në qytetin e Melegnanos.
Bëhet fjalë për disa episode në të cilat shtetasi Arben Isufaj në bashkëpunim me Vasilis Tselios dhe Altin Menaj e Jetnor Kapaj, për të cilët procesi është kryer më vete, sepse janë arrestuar në flagrancë, importonin nga Hollanda në Itali, transportonin dhe mbanin me qëllim që ta shpërndanin një sasi kokaine prej 3.5 kg. Vepra penale është kryer me rrethanën rënduese se është kryer me shumë se tre persona, në bashkëpunim. Ky trafik droge ka ndodhur më 11 dhejtor 2004 në Melegnano.
