Një prej autorëve të dyshuar të grabitjes së çiftit Laze në Tiranë muajin e kaluar, është vënë në pranga, ndërsa tjetri është shpallur në kërkim.
I arrestuari është Fatjon Mërtënika, 28 vjeç, lindur në Elbasan dhe banues në Tiranë, i dënuar më parë për veprën penale “Prodhim dhe shitja e narkotikëve”. Gjithashtu u bë shpallja në kërkim e shtetasit Markeljan Cungu, 22 vjeç, si bashkautor në këtë ngjarje, person me precedent kriminal, i dënuar më parë për veprat penale “Prodhimi dhe shitja e narkotikëve” dhe “Vjedhja”. Të dy akuzohen për veprat penale “Vjedhja me armë, e kryer në bashkëpunim, e mbetur në tentativë”, me pasoje plagosjen e rendë të dy shtetasve dhe “Armëmbajtja pa leje”, konfirmuan burime zyrtare nga Policia.
Gjatë operacionit për kapjen e 28-vjeçarit të koduar “Mjegulla”, efektivët e Policisë kanë gjetur të fshehur rreth një kilometër larg banesës që tentuan të vidhnin, dy armët e zjarrit, konkretisht një kallashnikov dhe një pistoletë, që dyshohet se i kanë përdorur autorët mbrëmjen e datës 19 janar 2020. Gjithashtu, së bashku me armët e zjarrit, Policia gjeti të fshehura një maskë, municion luftarak, fasheta plastike e sende të tjera.
Grabitja ndodhi në datën 19 Janar, rreth orës 21:35, në rrugën “Njazi Meka” Allias. Në banesën e Petrit Lazes, ku dy shtetas të maskuar tentuan të vidhnin me armë sende me vlerë. Nga autorët u qëllua me armë zjarri dhe për pasojë mbetën të plagosur rëndë të zotët e banesës, çifti Petrit dhe Afërdita Laze.
Dëshmia
“Plani për grabitjen është thurur nga Markelian Cungu”, mësohet të ketë deklaruar 28-vjeçari Fatjon Mertënikaj para uniformave blu.
“Më dha automatikun ndërsa pistoletën e mbajti vetë, kemi hyrë në banesë natën vonë, pasi Markeliani më tha se në shtëpi nuk banonte njeri. Por jemi ndeshur e me të zotit të shtëpisë, ndaj dhe kemi reaguar me armë…”, ka shtuar Fatjon Mertnikaj.
