Ditën e sotme, ora 16:00, luhet derbi i Madridit mes Realit dhe Atleticos, ndeshje kjo e vlefshme për javën e 22-të të kampionatit spanjoll.
“Los Blancos” pas fitores në fushën e Real Vallodollid, vijnë në këtë ndeshje si liderët e rinj të kampionatit duke përfituar nga humbja e Barcelonës kundër Valencias.
Atletico është 10 pikë larg kreut që mbahet nga Reali dhe për skuadrën e Simeones kjo sfidë është shansi i fundit për të mbajtur gjallë ndonjë shpresë të vogël për të fituar titullin kampion.
Barazimi nuk i intereson as Realit dhe as Atleticos, kjo për vetë faktin pasi skuadra e Zidane ndjen presionin e Barçës nga prapa, ndërkohë që Atletico duhet ta ngushtojë sa më shpejt diferencën me kreun aq më tepër që për momentin është edhe jashtë zonës Champions në renditje.
Hazard, Asensio dhe Bale janë 3 mungesat e rëndësishme të Zidane në këtë sfidë ndërkohë që mungesat e Joao Felix, Koke dhe Diego Costas dhembin më shumë për Atleticon pasi skuadra e Diego Simeones nuk ka luksin e skuadrës së Zidanes për sa i përket stolit.
Atletico sot do të kërkojë edhe një hakmarrje të vogël për humbjen në Superkupë ndaj Realit para 3 javësh, ndërkohë që sfida e fazës së parë mes tyre në kampionat përfundoi në barazim pa gola.
Ndërkohë përveç derbit, në La Liga luhen edhe tre sfida të tjera, ato mes Granadës dhe Espanyolit, Mallorca-Valladollid dhe në orën 21:00 luhet Valencia-Celta Vigo.
Formacionet e mundshme:
Real Madrid: Courtois; Carvajal, Varane, Ramos, Mendy; Modric, Casemiro, Kroos; Rodrygo, Benzema, Vazquez
Atletico: Oblak; Trippier, Savic, Felipe, Lodi; Saul, Herrera, Partey, Vitolo; Correa, Morata
