Gjykata e Tiranës ka dhënë masat e “arrestit me burg” për 5 personat e ndaluar për pengmarrjen e Jan Prengës në Kamëz, më 17 Janar, që përfundoi më pas me vdekjen e babait të 5 fëmijëve.
Masat
1. Bajram Hajri – Arrest me burg
2. Leonard Hajri – Arrest me burg
3. Olsi Turja – Arrest me burg
4. Elton Hajri – Arrest me burg
5. Festim Bixhdili – Arrest me burg
Gjyqtari që shqyrtoi kërkesën është Sokol Tona, ndërsa të arrestuarit përfaqësohen nga avokatë të zgjedhur vetë. Gjyqtari vendosi në përputhje me kërkesën e prokurorisë.
Leonard Hajri, Olsi Turja, Elton Hajri dhe Bajram Hajri akuzohen për “Mbajtje peng personi” dhe “Armëmbajtje pa leje” ndërsa Festim Beçdili për “Fshehje dhe asgjësim të kufomës”.
Seanca është zhvilluar me dyer të mbyllura, për shkak të sekretit hetimor.
“Të pandehurit deklaruan që s’kanë lidhje me veprën penale”, tha një prej avokatëve të personave të ndaluar. Ai tha se prokuroria paraqiti në gjykatë si provë pamje të kamerave të sigurisë në fotografi. Pamje që sipas tij, sprovohen asgjë, pasi aty nuk dallohen kush janë personat që shfaqen. Avokati sqaroi se personat e akuzuar kanë pranuar se kanë qenë në resort ditën e ngjarjes, por që s’kanë pasur lidhje me krimin. Ai tha se prokuroria deklaroi se do të sjellë pamjet filmike sapo ato të zbardhen. Prokuroria, shtoi, nuk paraqiti as prova as për arsyen që argumentoi se ndodhi krimi.
Para tri ditësh, Policia e Shtetit njoftoi zyrtarisht se kishte zbardhur pengmarrjen e Jan Prengës, ngjarje e ndodhur më 17 janar në Kamzë, i cili dyshohet se është dhunuar për vdekje nga autorët, por trupi i tij ende nuk është gjetur.
Katër persona u arrestuan gjatë operacionit të së hënës, që forcat RENEA zhvilluan në rrethinat e Shijakut, mes të cilëve edhe babai e vëllai i Altin Hajrit, i cili konsiderohet si kreu i grupit.
Në kuadër të operacionit të koduar “Resorti”, ditën e hënë, u bë e mundur kapja dhe ndalimi i shtetasve: Leonard Hajri, 35 vjeç, i dënuar më parë, Olsi Tarja, 36 vjeç, Elton Hajri, 32 vjeç dhe Bajram Hajri, 64 vjeç, banues në Shijak.
Policia sekuestroi 2 armë zjarri pistoleta, një sasi municioni, 16 aparate celularë, 4 automjete dhe një shumë eurosh. Policia tha se nga veprimet e thelluara hetimore ka rezultuar se personat, pas rrëmbimit të shtetasit Jan Prenga, kanë shkuar direkt në resortin në pronësi të shtetasit Altin Hajri, i shpallur në kërkim.
Ndërsa mbrëmjen e së martës, Forcat Operacionale arrestuan në Kavajë Festim Bexhdilin, 30 vjeç. Ky i fundit dyshohet se ka bashkëpunuar në fshehjen e trupit të 48-vjeçarit Prenga, pasi ka vdekur gjatë torturave.
Dyshohet se rrëmbimi ka ardhur si pasojë e një konflikti që një nga vëllezërit e viktimës ka pasur me organizatoret dhe rrëmbyesit, si pasojë e disa konflikteve për çështje droge në Britaninë e Madhe. Vëllai i viktimës, në gusht të vitit 2017, u dënua me 8 vite e gjysmë burg për trafik kokaine.
