Pas shumë eksperiencave në Europë, mesfushori me origjinë shqiptare, Blerim Dzemaili, ka lënë përfundimisht Bolognan dhe është transferuar te skuadra e Shenzhen në Kinë.
Nuk dihet shifra që ka përfituar Bologna nga shitja e Dzemailit ndërkohë që lojtari ka firmosur për 1 vit e gjysmë me skuadrën nga provinca e Guangdong që në sezonin e ri atë të vitit 2020 të futbollit kinez do të militojë në Kategorinë e dytë pasi u rrëzua nga Superliga për shkak se në vitin 2019 u pozicionua në vendin e 15-të duke mos arritur dot të sigurojë qëndrimin në elitë.
Skuadra kineze drejtohet nga Roberto Donadoni dhe me afrimin e Dzemailit do të synojnë të rikthehen menjëherë në Superligën kineze. Për ish-mesfushorin e përfaqësueses zvicerane kjo nuk do të jetë aventura e parë jashtë Europës pasi në vitin 2017-të ai ishte pjesë e kanadezëve të Montreal Impact në Major League Soccer ku arriti të realizonte 7 gola në 22 takime. 33-vjeçari në karrierën e tij të gjatë ka mbajtur veshur fanellat e Zurich në Zvicër, Bolton Wandrers në Angli, Torinos, Parmës, Genoas, Napolit dhe Bolognas në Itali dhe Galatasaray-t në Turqi. Kjo te Shenzhen do të jetë aventura e tij e parë në kontinentin aziatik.
