Mazhoranca u tërhoq sot nga votimi për “Paketën antishpifje”. Nga foltorja e Kuvendit, kreu i grupit parlamentar të PS-së, Taulant Balla kerkoi shtyrjen e shqyrtimit të dekretit të Presidentit, deri sa të vijë qëndrimi i kërkuar nga Komisioni i Venecias.
Raporteri për Shqipërinë në Grupin PPE të Parlamentit Europian David Lega deklaroi sonte se “ishte lajm i mirë që Rama nuk i rikonfirmoi ligjet problematike për median. Unë i kërkoj udhëheqësve politikë në Shqipëri të degjojnë shoqërinë civile, organizatat e lirisë së medias, opozitën shqiptare si dhe të përputhin projektligjet me standardet e BE para se t’i hedhin në votë.”
Hap pozitiv e ka quajtur presidenti i vendit, Ilir Meta, shtyrjen e votimit për Antishpjfjen nga Kuvendi, deri në pritjen e opinionit të Komisionit të Venecias. Në një deklaratë për mediat, Meta e ka përshëndetur atë që e ka cilësuar reflektim që i shërben një qëllimi më të madh të përbashkët.
