Raporteri për Shqipërinë në Grupin PPE të Parlamentit Europian, David Lega, ka reaguar sërish ditën e sotme, në lidhje me votimin që do bëhet sot në Kuvend për dekretet e Presidentit për ligjet e medias.
“Jam i shqetësuar për votimin sot në Shqipëri. Është problematike për zhvillimet demokratike si dhe për negociatat e antarësimit në të ardhmen.” -shkruan ai në një postim në Twitter.
Ditët e fundit, Këshilli i Europës publikoi një deklaratë për lirinë e medias, ku sipas të dhënave, viti 2019 ishte viti më i keq për lirinë e medias. Kjo bazuar te numri i sinjalizimeve që janë dhënë për problemet madhore me çështjen e lirisë së medias. Në total vjet u dhanë shtatë sinjalizime.
Sipas Këshillit të Europës, paketa antishpifje përbën një kërcënim për median. Për këtë arsye, ata e kanë çuar paketën në Komisionin e Venecias.
