Detaje të reja janë zbardhur nga ngjarja makabër që ndodhi pasditen e sotme në afërsi të Pazarit të Korçës.
Viktima është identifikuar si Dashnor Osmani rreth 50 vjeç dhe autori që e ka qëlluar është shtetasi Zamir Topi 42-vjeç, të dy banues në fshatin Pocestë, Korçë. Ata janë konfliktuar me njëri-tjetrin për motive banale dhe më pas Zamir Topi e ka qëlluar me sëpatë në kokë shtetasin Dashnor Osmani.
Autori dyshohet se është me probleme mendore. Ndërsa viktima Dashnor Osmani ishte një shitës ambulant në zonë që shiste banane. Gjithashtu, mësohet dhe se viktima është vëllai i një ish shefi i komisariatit. Uniformat blu kanë shoqëruar në ambientet e Policisë autorin për veprime të mëtejshme. Grupi hetimor po punon për të sqaruar rrethanat e ngjarjes.
Ngjarja ndodhi në sy të dëshmitarëve. “E goditi me sëpatë në kokë disa herë. U trondita. Sa e pashë u largova kisha frikë. U tmerrova desh më ra të fikët”, tha për mediat një i ri.
Dëshmia
Dashnor Osmani dhe Zamir Topi dyshohet se janë konflikuar për varrin e mamasë së këtij të fundit.
Topi dhe Osmani, bashkëfshatarë, kanë varrosur në 2014 të afërmit pranë njëri-tjetrit. Topi pretendonte se Osmani i kishte dëmtuar varrin e të ëmës dhe kishte vendosur eshtrat e nënës së tij.
Mes Osmanit dhe Topit ka pasur konflikte të vazhdueshme për këtë çështje. Gjatë marrjes në pyetje, Topi ka shfaqur pendesë për krimin e kryer.
“E godita disa here me sëpate të cilën e bleva sot në mëngjes. Ishalla nuk vdes. Nuk dua të bej krim. Unë nuk jam kriminel. Prej vitesh jemi grindur me njëri-tjetrin. Ai vendosi eshtrat e nënës së tij tek varri i nënës time. Nuk e duroja dot këtë gjë. E kisha paralajmëruar. Nuk gjeja qetësi. I thashë sërish sot por nuk mori vesh. Ndaj e godita”, mësohet të jetë shprehur 42-vjeçari, autori i krimit, para uniformave blu.
