Një sasi e vogël lëndë plasëse shpërtheu në pjesën e jashtme të një banese në lagjen Kushtrimi orët e para të mëngjesit, njoftoi këtë të premte Policia e Vlorës. Ndërkohë, i zoti i banesës Jetnor Devolli pretendon se ka shpërthyer “kazani i dushit”.
“Rreth orës 03:00 të mëngjesit të sotëm, në lagjen ‘Kushtrimi’ Vlorë, konkretisht në pjesën e jashtme të banesës së shtetasit J.D., dyshohet se ka shpërthyer një sasi e vogël lëndë plasëse. Si pasojë ka shkaktuar vetëm dëme materiale. Grupi hetimor po punon për sqarimin e rrethanave dhe zbardhjen e ngjarjes”, njoftoi policia.
Në një prononcim për gazetarët, i zoti i banesës thotë se “ka shpërthyer kazani i dushit”. “E lanë fëmijët ndezur, ne se pamë”, shton.
Ai tregon se të gjithë pjesëtarët e familjes ishin në banesë kur ka ndodhur shpërthimi, ndërsa konfirmon se nuk ka persona të lënduar.
Nga shpërthimi, janë shkaktuar dëme të konsiderueshme materiale në banesë.
