Ish-deputeti i Partisë Demokratike, Ervin Salianji, theksoi se Partia Demokratike e mbështet krijimin e Strukturës së Posaçme Antikorrupsion, e njohur ndryshe si SPAK.
I pranishëm në emisionin “Open”, Salianji tha se frika më e madhe janë rezultatet konkrete, që do të ketë pikërisht kjo strukturë.
“Duhet përshëndetur krijimi i SPAK-ut pavarësisht pengesave dhe peripecive dhe pas shumë ndërhyrjeve në sistem përfshirë edhe zgjedhjen e kryeprokurores së Përgjithshme të përkohshme. SPAK-u si çdo strukturë, duhet të provohet dhe gjykohet në bazë të punës dhe rezultateve konkrete.
Frika jonë e vetme është që pritshmëria e madhe e kësaj e strukture…Historiku i deritanishëm është që nuk ka pasur ndonjë dënim politik. Hetimet dhe procedurat janë kot sepse nuk ka pasur dënim. Çfarë ka ndodhur me reformën në drejtësi? Heqja e ndikimit politik mbi drejtësinë. Deri dje, politika ndërhynte nëpërmjet KLD-së apo institucioneve të tjera. Janë krijuar disa mekanizma që e pengojnë. Opozita për të denoncuar dhe mbrojtur interesin publik. Çfarë ka qenë për të denoncuar, ne e kemi denoncuar”, tha Salianji.
