Ditën e djeshme u luajt ndeshja mes Teutës dhe Partizanit e fituar nga durrsakët me rezultatin 1-0.
Por rëndësia e këtij rezultati u zbeh nga ngjarjet që ndodhën në fushën e lojës, aty ku Fabian Beqja nuk u përmbajt, duke u kapur me grushta me brazilianin William Cordeiro.
Anësori i Teutës u ndëshkua me karton të kuq, ashtu sikurse edhe kundërshtari i tij. Sherri ishte masiv dhe u përfshinë edhe lojtarë të tjerë.
Me të kuq u ndëshkuan edhe Deian Boldor dhe Amer Duka, ndërkohë që protagonisti i sherrit, Beqja, ka dhënë versionin e tij të ngjarjes dhe pretendon se Cordeiro e ka ofenduar pa pushim dhe kjo e ka “nxjerrë atë nga binarët”.
“Ishte një moment shumë i keq. Fillimisht unë nuk veprova dhe nuk i thashë asgjë me gojë. Mirëpo, Melo erdhi dhe më ofendoi, e më pas më shtyu me duar. Unë ruajta qetësinë për momentin, por ai përsëri nisi të më ofendojë. Mendova se do të kishte një ndëshkim për atë dhe jo për mua. Veprimi i tij ishte diçka shumë e poshtër, nuk di si ta përshkruaj tani”, ka deklaruar Beqja për “Panorama Sport”.
