Didier Deschamps do të jetë trajner i Francës deri në Kupën e Botës, “Katar 2022”. Lajmin e ka bërë të ditur federata franceze e futbollit.
“Jam shumë i lumtur e shumë krenar që do të vazhdoj aventurën me këta djem deri në Kupën e Botës 2022, edhe nëse qëllimi ynë i tanishëm është Euro 2020”, tha Deschamps.
Presidenti i Federatës, Noel Le Graet kishte thënë më parë se një zgjatje e kontratës për 51-vjeçarin, varej nëse Franca do të kualifikohej për Evropianin 2020. Deschamps e drejtoi si duhet Francën në fazën eliminatore, dhe tashmë janë në grup, në fazën finale me Gjermaninë dhe Portugalinë. Ndërsa skuadra tjetër do të njihet pas fazës play-off.
Por, përpara fazës finale të verës së ardhshme, Le Graet tha për AFP se Franca do të përballet me Ukrainën dhe Finlandën në fushën e vet në mars, duke shtuar se janë në bisedime për të kundërshtarët për miqësoret e datave 1 dhe 8 qershor.
Deschamps bëhet kështu trajneri me kohëzgjatjen më të madhe në krye të Francës, duke kapërcyer tetë vjet dhe gjashtë muaj të Michel Hidalgo nga janari 1976 – qershor 1984. Deschamps ka fituar 65 nga 100 ndeshjet që nga zëvendësimi i Laurent Blanc si drejtues i ekipit kombëtar pas Euro 2012.
