Nga Klaudio Pulaha
Në ditën e rinisë, realiteti shuplakë pushteteve në Shqipëri!
Në 8 dhjetor, e konsideruar dhe festuar si Dita e Rinisë, shifrat dhe realiteti vijnë shumë kokëforta. Për të treguar se Rinia në Shqipëri, jo vetëm nuk mund të festojë (siç bëjnë rëndom shpesh pushteti dhe disa organizata që kërkojnë në këtë ditë të shfaqin një realitet ndryshe, apo edhe se çfarë kërkojnë të bëjnë për të rinjtë), por edhe duhet të ngrejë zërin e saj fort për të kërkuar llogari ndaj pushtetit qendror dhe lokal, komunitetit dhe vetes!
Në këtë ditë, 19 fëmijë dhe të rinj humbën jetën, jo si pasojë e tërmetit të fuqishëm që përfshihu Shqipërinë, por si shkak i kushteve të pakontrolluara të banesave ku ata jetonin, si shkak i korrupsionit në të cilin ndërtohen banesat e tyre dhe si shkak i heshtjes që shpesh kaplon të rinjtë e pafuqishëm në këtë situatë. Me qindra të rinj këto ditë ikën jashtë vendit për të gjetur një strehë më të sigurtë dhe për të marrë ndihmat e para.
Në vend te ikjes nga Shqipëria, pse nuk kërkoni llogari?!
Në këtë ditë, në vend të ikjes e ikjes pa fund nga vendi (80% e të rinjve kërkojnë të largohen) të rinjtë në Shqipëri duhet të zgjedhin kërkesën e llogarisë se pse:
– Pse 94 % e të rinjve nuk kanë asnjë shpresë për zgjidhjen e problemeve të tyre, si nga institucionet qendrore ashtu edhe ato lokale.
Pse nuk kërkoni llogari?
– Pse 39% e të rinjve vlerësojnë papunësinë si problemin kryesor me të cilin përballen të rinjtë në jetën e tyre.
Pse nuk kërkoni llogari?
– Pse 89% e të rinjve deklarojnë se bashkitë nuk janë aspak miqësore me ta dhe thuajse 57% e të rinjve e vlerësojnë punën e tyre për rininë me zero pikë.
Pse nuk kërkoni llogari?
– Pse 62 % e të rinjve nuk besojnë tek asnjë grupim politik, për të trajtuar problemet dhe për të bashkëpunuar me të rinjtë.
Pse nuk kërkoni llogari?
– Pse 84 % e të rinjve shprehen se partitë politike janë aspak apo shumë pak të hapura për të zgjidhur problemet e të rinjve, duke menduar se në 35 % të rasteve konsultohen me të rinjtë vetëm gjatë fushatave elektorale.
Pse nuk kërkoni llogari?
Pse nuk kërkoni llogari për këtë sistem që e ndërtuan paraardhësit tani, por që vetem ne mund ta ndryshojmë?!
Pse nuk kërkoni llogari për këtë realitet që na rëndon çdo ditë dhe që vetë ne mund ta ndryshojmë?!
pse nuk zgjidhni të kërkoni e luftoni për shpresën tuaj të të ardhmes së këtij vendi, ndërsa mendoni se shpresa ka vdekur?!
Pse, pse dhe pse?!
Në Ditën e Rinisë, si nje prej tyre, thërras vetëm: Mos të largohemi nga ky vend, por ejani të bashkohemi dhe të ndryshojmë rregullat në politikë, qeverisje, ekonomi, stabilitet e kudo!
