Situata pas tërmetit, sipas PD nuk po përballohet në mënyrën më të mirë nga qeveria. I ftuar në studion e lajmeve në RTV Ora, ish-deputeti i PD, Flamur Noka thotë se tërmeti tregoi se shteti është inekzistent.
Noka u shpreh se shteti nuk po zbaton protokollin e emergjencave civile.
‘Për emergjencat civile që kishte Shqipëria të jeni të sigurt që do të ishim duke vajtuar sot akoma më keq. Strukturat shtetërore që duhet të funksiononin ishin të shkërmoqura.
Sot e kësaj dite askush në këtë vend nuk di të thotë një shifër sa është vënë në dispozicion. Kemi parë një qeveri inekzistente një kryeministër që bën propagandë. Keni parë në terren kreun e emergjencave civile? Kemi parë kryeministrin që hap derën e autobusit dhe thotë ti hyrë, ti mos hyrë. Kjo është karagjozllëk.
Edhe post tërmeti është shou dhe propagandë dhe nuk ka lidhje me realitetin. Ka një protokoll në rast emergjence si funksionon shteti, prioritetet prevalojnë. Kjo do të thotë që investimet e tjera shumëzohen me zero përballë kësaj situate.
Noka tha se opozita ka bërë detyrën dhe nuk e ka përdorur situatën e tërmetit për propagandë.
‘Por tashmë që faza e emergjencës kaloi tashmë ne kemi detyrë të jemi vigjilentë për të parë si po reagon dhe çfarë masash ka marrë qeveria.’
