Këshilli i Lartë Gjyqësor ka vendosur që të rinisin gjyqet tek gjykatat për të cilat ishte ndërprerë puna për shkak të dëmeve nga tërmeti. Vendimi është marrë ditën e sotme dhe detyron Gjykatat e Tiranës, atë të Durrësit, Kavajës dhe Kurbinit që të rikthehen në punë nesër.
Më konkretisht, në Tiranë do të rinisin punën Gjykata e Rrethit Gjyqësor, Gjykata e Apelit, Gjykata e Krimeve të Rënda, Gjykata e Apelit për Krimet e Rënda dhe Gjykata Administrative e Shkallës së Parë.
KLGJ vendosi pezullimin e punimeve të gjykatave të lartpërmendura për shkak të dëmeve që kishin pësuar nga lëkundjet e tokës që u regjistruan në datën 26 Nëntor. Pasi ekspertët kanë bërë inspektimet e duhura, KLGJ ka dhënë urdhrin që gjykatat të rikthehen në normalitet.
