Mesditën e sotme u raportua se në autostradën Tiranë-Durrës u grabit me forcë një makinë e “Security Spartan”, në dalje të Megategut.
Në momentin e grabitjes, në makinë ka qenë një punonjës i “Security” dhe një i Megateg, të cilët autorët, ende të paidentifikuar, i kanë zbritur në momentin që iu kanë marrë mjetin.
Ndërkohë, makina është gjetur e braktisur në rrugën dytësore, disa kilometra larg “Megategut”.
Sipas News 24 dyshohet se grabitësit kanë marrë 300 milionë lekë (të vjetra) nga makina.
Ndërkohë dhe Policia e Shtetit ka dalë me një deklaratë zyrtare lidhur me këtë ngjarje
Njoftimi:
Tiranë/Informacion paraprak
Rreth orës 12:40, në afërsi të Qafë Kasharit, persona të paidentifikuar kanë marrë me forcë një automjet në pronësi të një firme private Security dhe me pas automjetin e kanë braktisur në rrugën dytësore të autostradës Tiranë-Durrës.
Shërbimet e policisë kanë shkuar menjëherë në vendngjarje dhe vijojnë kontrollet dhe krehjen e zonēn ku u gjet mjeti i braktisur me qëllim kapjen e autorëve.
Grupi hetimor nën drejtimin e Prokurorisë po kryen veprimet për administrimin e çdo prove të vlefshme që do t’i shërbejë hetimit për identifikimin e autorëve dhe zbardhjen e ngjarjes
